Një ditë para zgjedhjeve lokale në Kosovë, kryeministri Albin Kurti ishte i pranishëm në Shkodër për të ndjekur gjysmëfinalen e “Superkupës Mbarëkombëtare” në basketboll. Kurti u shpreh se për të ishte kënaqësi të ndiqte një ndeshje të një ekipi nga Shqipëria me një ekip nga Kosova.
“Është kënaqësi të jem në Shkodër. Kjo që do të shohim mes Vllaznisë dhe Prishtinës është më pak se ndeshje sepse jemi bashkë por është edhe më shumë se sa lojë pasi jemi bashkë”- tha kryeministri i Kosovës.
Ai u ngacmua nga gazetarët edhe për çështjen e bashkimit kombëtar, ku tha se qytetarët janë para politikanëve në këtë aspekt.
“Tek fusha e bashkimit tonë, populli është para politikës dhe ne politikanët le të ndjekim vullnetin e qytetarëve tanë” – u shpreh Kurti.
Kryeministri i Kosovës në respektim të heshtjes zgjedhore nuk bëri asnjë koment për ditën e diel ndërsa gjithashtu zgjodhi të mos komentonte as tensionet e fundit me Serbinë për shkak të aksioneve të policisë në veri. Të pranishëm në pallatin e sportit “Qazim Dervishi” ishin ministrja e Arsimit dhe Sportit, Evis Kushi si dhe kryetarja e Bashkisë Shkodër, Voltana Ademi.
