Kukësi rigjen fitoren pas gjashtë javësh në kampionatin shqiptar. Verilindorët, të cilët po kalonin një situatë të vështirë, e mbyllën vitin 2022 me tri pikë të rëndësishme. Kukësi fitoi minimalisht ndaj Laçit në shtëpi.
Miqtë ishin më kërkues në nisje të sfidës ndërsa në minutën e 13 iu anulua një gol nga sistemi VAR. Vendasit e shtuan presionin në vazhdim në portën kundërshtare. Goli i vetëm i sfidës u realizua në minutën e 33-të lojës nga kapiteni Gjelbrim Taipi, i cili mposhti portierin Dajsinani me një goditje të bukur dënimi.
Në pjesën e dytë, Shkurtaj nuk e kishte fatin me vete, ndërsa goditi shtyllën. Por verilindorët u treguan të saktë në mbrojtje, duke mos lejuar hapësira dhe e mbyllën sfidën me fitore. Kurbinasit e drejtuar nga Gentian Mezani u ndalën pas dy fitoreve radhazi. Kukësi e lë vendin e fundit dhe ngjitet përkohësisht në vend të tetë në renditje.
Discussion about this post