Demokratja Jorida Tabaku ka reaguar sot në lidhje me padinë që kreu i kompanive të inceneratorëve Klodian Mërtiri ka ngritur pak javë më parë ndaj PD. Përmes një postimi në Facebook, ajo shkruan se çdo ditë faktet po tregojnë abuzimet e Mërtirit me inceneratorët, përfshirë edhe bashkëpunëtorët e tij, të cilët sot janë në kërkim për korrupsion dhe abuzim me detyrën.
“Pak javë pasi kishte nisur komisioni hetimor për inceneratorët njeriu që është pronari real i 3 kompanive të inceneratorëve dhe strumbullari që është nyja lidhëse mes kompanive dhe shtetit, Mirel Mërtiri (i njohur edhe si Klodian Mërtiri) dërgoi një padi për shpifje ndaj disa drejtuesve të lartë të PD, përfshirë edhe mua, por edhe kryetarit të PD.
Sipas tij, akuzat që ne i kemi bërë me fakte dhe prova Mirel Mërtirit ishin sajesat tona politike. Një hap të tillë Mërtiri e ka marrë në fakt edhe ndaj mediave kur ato zbuluan dhe evidentuan lidhjet e tij me ministrat e qeverisë Rama. Sot, pak ditë pasi Mërtiri dërgoi në SPAK akuzën e tij për shpifje, Mirel Mërtiri është në kërkim ndërkohë që skema e tij dhe bashkëpunëtorëve të tij po zbulohet dita ditës”, shkruan Tabaku.
Sipas saj, Gjykata analizoi dhe vërtetoj se akuzat dhe denoncimet e PD-së për inceneratorët qëndrojnë dhe po zbardhin të vërtetën për këtë arsye ka refuzuar padinë e Mërtirit. Sipas saj Mërtiri dhe bashkëpunëtorët e tij do të japin llogari për 430 mln eurot e vjedhura.
“Sa më shumë koha kalonte aq më e qartë bëhej afera që mbante erë korrupsion dhe aq më të qarta bëheshin lidhjet okulte të Mërtirit me Arben Ahmetaj (me të cilin ka konsumuar edhe udhëtime), me Damian Gjiknurin, me Edi Ramën, me Ëngjëll Agaçin, me Qazim Sejdinin, me Armando Subashin dhe padyshim me kumbarin e vogël Erion Veliaj.
Kjo është një aferë me një vlerë marramendëse prej 430 mln eurove dhe mjafton t’u them që sipas të dhënave të Ministrisë së Financave inceneratori i Tiranës është ndërtuar në 30% të kapacitetit të programuar megjithëse ka marrë 100% të fondeve .Pikërisht duke pasur parasysh këto prova të qarta akuza e ngritur nga Mirel Mërtiri karshi kryetarit të PD, meje dhe kolegëve të mi u pezullua nga Gjykata”, shprehet Tabaku, duke theksuar se Komisioni i Hetimit do të vazhdojë punën për të zbardhur skemat e vjedhjeve nga inceneratorët.
Discussion about this post