Lajmet e këqija dhe dhimbjet e kokës te klubi i Chelsea-t nuk kanë fund. Sikur të mos mjaftonte ecuria e dobët këtë sezon në Premier dhe Champions League, problemeve i shtohen edhe pakënaqësitë e futbollistëve të skuadrës së drejtuar nga Graham Potter.
Mesfushori anglez Mason Mount është kthyer në një çështje brënda klubit, motivi, është kontrata e tij që skadon pas një viti. Deri këtu në rregull, problem është dëshira e lojtarit. Mount nuk ka dëshirë të rinovojë dhe kjo gjë nuk i pëlqen Todd Boelhy-t me shokë.
Mediat britanike, bëjnë me dije se drejtuesit e 2-herë kampionëve të Europës kanë vendosur për ta nxjerrë në shitje mesfushorin në rast se nuk do të gjejnë gjuhën e përbashkët për vazhdimin e bashkëpunimit edhe përtej vitit 2024. Mount në verë do të shitet për të gjeneruar të ardhura, pasi në rast të kundërt Chelsea rrezikon ta humbasë me kosto zero.
Alternativat nuk mungojë për sulmuesin dhe ai pritet të mos largohet nga Premier League. Liverpool është klubi më i kuotuar për të marrë shërbimet e 24- vjeçarit. “Të kuqtë” po zhvillojnë një sezon me ulje dhe ngritje, ndërsa në merkaton e verës do të synojnë disa transferime për të përforcuar skuadrën, për t’u rikthyer përsëri konkurues.
Vlera e mesfushorit në treg llogaritet afro 70 milionë euro, por Liverpool dhe klubet e interesuara mund të përfitojnë për ta transferuar me një shifër më të ulët për shkak të kontratës e cila përfundon në vitin 2024.
Mount po luan sezonin e katërt te Chelsea, teksa këtë sezon numëron 22 paraqitje në Premier League. Në total 24-vjeçari, numëron 190 ndeshje dhe 33 gola në të gjitha kompeticionet me “Blutë e Londrës”.
Discussion about this post