Të shtëna me armë janë shënuar këtë të mërkurë në Fushë Kuqe drejt një automjeti me të cilin lëvizte ish-deputeti socialist Armando Pregna.
Nga të shtënat nuk ka të lënduar, ndërsa ka qenë vetë Prenga që ka telefonuar policinë dhe ka treguar autorin e ngjarjes. Policia lokale konfirmoi se ka shpallur në kërkim F.Ismailajn, i cili, sicc bëjnë me dije burime policore, ka përdorur disa emra.
“Shtetasi A.P. (Armando Pregna), 49 vjeç, ka njofuar sallën operative të Komisariatit të Policisë Kurbin se në Fushë Kuqe, ndërkohë që qarkullonte me automjet shtetasi F.I., 29 vjeç, kishte qëlluar me armë zjarri pistoletë në drejtim të automjetit të tij. Nga të shtënat nuk ka asnjë shtetas të dëmtuar. Menjëherë, shërbimet e Policisë kanë shkuar në adresën e dhënë, kanë rrethuar zonën dhe po vijojnë kontrollet, me qëllim lokalizimin dhe kapjen e shtetasit F.I., i cili është shpallur në kërkim, bashkë me automjetin tip ‘Benz’ me të cilin është larguar. Ndërkohë, grupi hetimor, në drejtimin e Prokurorisë, po vijon veprimet hetimore për sqarimin e rrethanave të këtij rasti“, thuhet në njoftimin e policisë për ngjarjen.
Pregna i shkarkuar nga dekriminalizimi
Deputeti socialist Armando Prenga është ndër ligjëvënësit e larguar për shkak të ligjit të dekriminalizimit. Në vitin 2017, ai dha dorëheqjen pas kërkesës së Prokurorisë së Përgjithshme drejtuar KQZ-së për heqjen e mandatit të tij.
Prokuroria e Përgjithshme bëri me dije se nga verifikimi i të dhënave brenda dhe jashtë Shqipërisë për deputetin Prenga, ka rezultuar se ai nuk ka deklaruar precedentët penalë në Itali në vitet 1996-1997, si dhe një vendim të formës së prerë të gjykatës së Kurbinit në Shqipëri, në të cilin është dënuar me gjobë për “falsifikim dokumentesh”. Në bazë të këtyre të dhënave, Prokuroria deklaroi se Prenga është “në kushtet e ndalimit të ushtrimit të funksionit, në bazë të ligjit për “Verifikimin e Integritetit të personave që zgjidhen, emërohen ose ushtrojnë funksione publike”.
Pas kësaj, Armando Prenga dha dorëheqjen.
Deputet në dy legjislatura, Prenga ka qenë shpesh në qendër të akuzave ndaj opozitës për lidhjet e dyshuara kriminale.
Discussion about this post