Avokatët e ish-presidentit amerikan Donald Trump-it janë lajmëruar se ish-presidenti amerikan do të paditet si pjesë e një hetimi federal në përpjekjen për të ndikuar në zgjedhjet presidenciale të vitit 2020, raportoi NBC News, pa përmendur burimet e tij.
Në raport nuk saktësohej se kur do të ngrihej aktakuza.
Prokurori i posaçëm Jack Smith po heton përpjekjet e Trump për të përmbysur rezultatin e zgjedhjeve të vitit 2020, kur ai u mund nga Joe Biden. Zyrtarët kanë dëshmuar se në fund të mandatit të tij, Trump u bëri presion me akuza të rreme për mashtrim të përhapur. Mbështetësit e tij sulmuan Capitol Hill më 6 janar 2021, në një përpjekje për të ndaluar Kongresin të ratifikonte rezultatin e zgjedhjeve.
Vetë Trump tha më 18 korrik se mori një letër nga Smith që e informonte se ishte nën hetim.
Media të shumta amerikane raportuan se avokatët e Trump shkuan sot në Departamentin e Drejtësisë dhe u takuan me zyrtarë në zyrën e Smith. Nuk është e pazakontë që avokatët e një të pandehuri të mundshëm të takohen me prokurorët federalë përpara se të ngrihen akuzat.
Ata shkuan edhe më parë në ministri dhe u takuan me Jack Smith përpara se të shpallej se Trump do të fajësohej për dokumentet e klasifikuara që ai mori me vete pasi u largua nga Shtëpia e Bardhë në 2021.
Discussion about this post