Tensionet në veri të Kosovës kanë sjellë reagimin e menjëhershëm të Albin Kurtit i cili zhvilloi një takim me krerët e partive opozitare Lumir Abdixhikun e LDK-së dhe Memli Krasniqin e PDK-së. Abdixhiku sqaroi kryeministrin që LDK mbështet shtrirjen e ligjshmërisë në vend.
“Në takim, shpreha shqetësimet tona për gjendjen e krijuar në Veri. Dhashë mbështetje për shtrirjen e ligjshmërisë në vend dhe për punën e Policisë tonë atje “, ka shkruar Abdixhiku në faqen e tij zyrtare.
Ndër të tjera ai thotë se ka kërkuar informacion për hapat e mëtejshëm pasi Kosova nuk mund të durojë tensione në territorin e vet.
“Njëkohësisht kërkova qartësime shtesë për rrugën tonë përpara, qartësime që duhet të na vijnë sa më parë. Kosova nuk e ka luksin të durojë tensionet në territorin e vet. Kryeministrit Kurti i kërkova poashtu koordinim të plotë me aleatët tanë; në veçanti me SHBA-të dhe BE-në. Është përgjegjësi e detyrim i tij dhe Qeverisë që koordinimi të bëhet menjëherë”, thotë Abdixhiku
Tensionet në Kosovë vijojnë prej ditës së hënë pas vendimit për vemdosjen e reciprocitetit me targat e automjeteve që hyjnë në territorin e Kosovës.
