Tërmet i fuqishëm në Greqi, banorët e alarmuar lënë banesat

Një tërmet i fortë me magnitudë 6.1 ballë të shkallës Rihter u regjistrua në disa zona të Kretës në Greqi.

Sipas mediave lokale, banorët u shfaqen të shqetësuar pasi tërmeti u pasua nga një gjëmim i fortë, ndërsa shumë prej tyre dolën nga shtëpitë e tyre për të qenë të sigurt.

Si pasojë e tërmetit, janë regjistruar rrëshqitje të vogla dheu në rrjetin rrugor dhe janë prishur fasadat e disa ndërtesave.

Zjarfikësit në gatishmëri

Shërbimet zjarrfikëse janë në patrullim aktiv për të kontrolluar gjendjen në terren, ndërsa rrëshqitje të vogla dheu janë vërejtur në rrugët provinciale. Në rrugën “25 Gushti” në Heraklion, një pjesë e një ndërtese u shemb pjesërisht, por fatmirësisht pa pasoja në njerëz.

Bashkitë e Heraklionit dhe Lasithit kanë urdhëruar inspektime në institucionet arsimore, megjithatë nuk është raportuar ndonjë problem serioz. Në një deklaratë zyrtare, Bashkia e Heraklionit njoftoi se të gjitha strukturat e saj janë në gjendje gatishmërie.

Autoritetet vazhdojnë monitorimin, ndërsa qytetarët këshillohen të ndjekin udhëzimet zyrtare dhe të shmangin zonat me rrezik potencial.