Trafikantët shqiptarë ofrojnë paketa premium për të shkuar në Britani

Kontrabandistët e njerëzve kanë nisur udhëtime shërbimi Premium për emigrantët për të hyrë në Britani. Ata janë duke premtuar se do të anashkalojnë qëndrimin në qendrat e “ferrit.” “The Sun” shkruan se trafikantët shqiptarë tani po ofrojnë një paketë prej 11.000 £ për person, në të cilën përfshihet një udhëtim 40 minuta me skaf nga Belgjika, pa rrezik për tu burgosur në mbërritje.

Ata gjithashtu premtojnë akses te avokatët që do t’i ndihmojnë emigrantët të shmangin kampet ose dëbimin e shpejtë.

Një burim në kontakt me bandat i tha The Sun: “Shqetësimi kryesor i emigrantëve tani është të gjenden të grumbulluar në kampe të tmerrshme dhe të mos jenë në gjendje të largohen.Por bandat tani po ofrojnë një shërbim premium për të cilin thonë se e shmang atë dhe disa njerëz janë të gatshëm të paguajnë çmimin.”

Trafikantët zakonisht paguajnë nga 3,500 deri në 5,000 £ për të transportuar shqiptarët përmes Kanalit,  ku oficerët e Forcave Kufitare në pritje i dërgojnë ata në kampe.

Lexo edhe: “Alarmante”! Media britanike shkruan për sulmin e hakerave ndaj SHISH

Por shërbimi premium është një përgjigje ndaj alarmit në rritje ndaj raporteve për kushte të tmerrshme në kampet e mbipopulluara si Manston në Ramsgate, Kent.

Ata gjithashtu duan të marrin lekë, para se dimri të mbyllet dhe ta bëjë kalimin e Kanalit edhe më të rrezikshëm. Një reklamë në TikTok thotë: “Udhëtim me skaf nga Belgjika për 40 minuta në MB. Çmimi më i mirë. Mos e vendosni jetën tuaj në rrezik në varkë. Sigurojmë kalim të sigurt, për të mos qëndruar asnjë ditë në kamp.”

Një hetues i Sun i dërgoi mesazh njërës prej bandave duke i kërkuar detaje dhe ai i tha: “Ti nuk shkon në një qendër paraburgimi. Një orë udhëtim. Çmimi 11,000 £ për person.”

I pyetur nëse njerëzit e kishin përdorur tashmë rrugën, trafikanti u përgjigj: “100 për qind. Të enjten dhe të premten e javës së kaluar ne dërguam njerëz.”

Një tjetër reklamë e TikTok ofroi një kalim nga një vend i BE-së në MB, me pasaportë biometrike dhe një shoqërim, për 15,000 £. Tregtia fitimprurëse është bërë e lehtë pasi shqiptarët lejohen të qëndrojnë pa viza deri në 90 ditë në çdo vend të BE-së të zonës Shengen, siç është Belgjika.