Prokuroria Themelore Publike në Shkup është duke zhvilluar një procedurë para-hetimore, jo për të hetuar arsyet e aksidentit tragjik me 45 të vdekur në Bullgari, por te fakti që autobusi ka lëvizur jashtë vendit pa licensën përkatëse.
“Edhe mua më intereson kjo. 135 herë ai autobus vetëm këtë vit ka dalë jashtë vendit pa licencë për transport ndërkombëtar. Po presim të mbahet seanca paraprake dhe nëse ka prova do ta marrim rastin”, tha kryetarja e Prokurorisë Speciale për Prokurorinë e Krimit të Organizuar dhe Korrupsion, Vilma Ruskovska.
Prokurorja theksoi se ka mundësi që rasti i hetimit të djegies së autobusit, në të cilin humbën jetën 45 qytetarë të vazhdojë edhe në Maqedoni të Veriut
“Nuk janë gati të gjitha ekspertizat dhe analizat e kolegëve nga Bullgaria. Nafta është vërtet e vështirë për t’u ndezur. Por është e mundur që të ketë pasur shumë shkëndija, autobusi ka goditur djathtas, pastaj majtas dhe përsëri në trotuarin e djathtë dhe ka mundësi të ketë pasur shkëndija”, tha Ruskovska.
Ruskovska tha se Prokuroria maqedonase ka bashkëpunim të mirë me kolegët bullgarë, duke e bërë më të thjeshtë zbardhjen e ngjarjes së rëndë.
Discussion about this post