Policia e Vlorës ka ndërmarrë një aksion kundër transportit të mallrave të kontrabanduara përmes pikës kufitare të Qafë Botës, ku si rezultat ka arrestuar një shofer trajleri dhe dy doganierë, ndërsa një biznesmen është shpallur në kërkim.
Në kuadër të operacionit policor të koduar “Tranzit 4” janë vënë në pranga shtetasit Niko Gazeli, 63 vjeç, i cili transportonte mallra të sasive të mëdha me kamionë dhe trajlera, për llogari të biznesit të shtetasit Arjan Murtaj, 52 vjeç,. Ky i fundit është shpallur në kërkim nga uniformat blu.
Niko Gazeli akuzohet për veprën penale “Kontrabanda me mallra të tjera”, ndërsa biznesmeni Arjan Murtaj akuzohet për veprën penale “Tregtimi dhe transportimi i mallrave që janë kontrabandë”.
Në pranga janë vënë dhe shtetasja Anila Adhami, 54 vjeçe, me detyrë doganiere në Degën Doganore Qafë Botë dhe shtetasi Andon Velo, 49 vjeç, me detyrë përgjegjës turni në Degën Doganore Qafë Botë. Gjithashtu është proceduar penalisht në gjendje të lirë dhe shtetasi Erion Ademi, 43 vjeç, me detyrë agjent në Degën Doganore Qafë Botë. Ata akuzohen për veprën penale “Shpërdorimi i detyrës”.
“Gjatë operacionit, shtetasi Niko Gazeli u kap në PKK Qafë Botë, duke futur në Shqipëri, me mjete të rënda (kamionë dhe trajlera), sasi të mëdha produktesh për konsum, të dyshuara të kontrabanduara. Ndërkaq, 52-vjeçari u shpall në kërkim, pasi dyshohet se këto mallra transportoheshin për llogari të biznesit që ai administronte. Arrestimi i shtetasve Anila Adhami dhe Andon Velo, si dhe procedimi i 43-vjeçarit u bënë pasi dyshohet se, duke shpërdoruar detyrat, kanë lejuar kryerjen e këtij aktiviteti kriminal. Punohet për kapjen e shtetasit Arjan Murtaj, dhe për individualizimin dhe dokumentimin e përgjegjësisë penale të të gjithë shtetasve të implikuar në këtë rast.” – thuhet në njoftimin e Policisë së qytetit bregdetar.
Blutë kanë sekuestruar në cilësinë e provës materiale sasi të mëdha produktesh ushqimore dhe detergjentë, 2 kamionë, 1 trajler dhe 4 celularë.
Discussion about this post