Zoran Zekiç kërkon kohë që të përçojë idetë e tij te Partizani. Trajneri i të kuqve ka qenë pjesërisht i kënaqur me atë që ka parë nga ekipi tij në fushën e lojës në ndeshjen e parë ndaj BATE Borisov, që përfundoi në barazim 1-1.
“Kemi luajtur me vetëm 25 ditë në dispozicion. Disa lojtarë janë të lodhur, nuk kishim përqendrim. Ne bëmë presing të lartë në pjesën e parë, pastaj u tërhoqëm për të pritur momentin tonë për të sulmuar në thellësi. Me rastin e parë, BATE Borisov shënoi, por pastaj falë Zotit shënuam edhe ne.
E kam parë BATE në ndeshjet e fundit që ka luajtur, kishim informacione, ishim të përgatitur shumë mirë. Është e qartë në këtë moment që ata kanë luajtur shumë ndeshje dhe kanë automatizëm më të mirë se ne në këtë moment ndaj duhet të luajmë më shpejt dhe më me agresivitet.
Por duhet të them se në këtë dy javë progresi i skuadrës time ka qenë i madh. Duhet të shfrytëzojmë këto 7 ditë për t’u përgatitur taktikisht dhe fizikisht.
Rezultati është aktiv, shanset 50-50 pas këtë ndeshje, është vetëm pjesa e parë. Duhet të jemi më mirë dhe të besojmë te ajo që punojmë dhe të jemi pozitiv. Na duhet mobilizim më i madh në ndeshjen e kthimit.
Ne e dimë që BATE është më e rrezikshme në krahun e majtë me Kontsevoi dhe ai krijonte raste. Ai kishte 2-3 situata dhe askush nuk e mbështeti Hadrojn, duhet t’i qëndronim më afër tij. Lëvizjet tona duhet të jenë më të mira pasi krijohen situata. Kur them disa lojtarë janë të lodhur, është edhe se kemi ndryshuar sistemin me dy lojtarë që luajnë para mbrojtjes për të mbështetur fazën mbrapa.
Telushi është kapiteni, nëse luan apo jo, ai mbetet shumë i rëndësishëm për ne. Nga situata sot, jam shumë i lumtur me dy qendërmbrojtësit. Kishim mundësi disa herë të bënim diagonale në mesfushë, por nuk e bëmë. Duhet të më jepni pak më shumë kohë. Kam pak ditë këtu dhe vendos lojtarët ashtu siç i shoh në këto momente. Me vazhdimin e sezonit, do të njoh më shumë lojtarët pasi të kemi luajtur shumë ndeshje dhe jam i sigurt që do të jemi më mirë javë pas jave.
Grezda? Ka nevojë për kohë, ai nuk është gati që të jetë Grezda që të gjithë njohim, nuk është në 100%. Me kalimin e kohës do të jetë në formë të mirë dhe ne e mbështesim.
Rastet e diskutueshme? Pas situatës së dytë që nuk u dha penallti, u shënua goli nga goditja e këndit. Tani e pashë që ishte në vijën e zonës, gjyqtari ishte shumë afër aksionit”, tha Zekiç për mediat në fund të ndeshjes.
Discussion about this post