Shqipëria U-19 për vajza i mbylli me fitoren 1-0 ndaj Armenisë, kualifikueset e Kampionatit Europian për këtë grupmoshë. Gjashtë pikë në tre ndeshje arritën të sigurojnë vajzat kuqezi të drejtuara nga trajneri Kreshnik Krepi, duke u renditur në vendin e dytë në grupin B3 në Ligën B.
Edhe pse nuk u arrit objektivi kryesor, që ishte vendi i parë në grup, trajneri Kreshnik Krepi vlerëson paraqitjen e skuadrës në këtë fushatë eliminatoresh dhe ka mbetur i kënaqur nga grupi i vajzave. Në një intervistë për fshf.org, ai bën një analizë të shkurtër të tre ndeshjeve të ekipit të tij ndaj Letonisë, Rumanisë dhe Armenisë.
“Sigurisht që objektivi ynë ishte vendi i parë në grup dhe ne gjithmonë përgatitemi për të arritur këtë objektiv, pavarësisht kundërshtarëve në grup. Sa i përket këtyre eliminatoreve, jam shumë i kënaqur me të gjithë grupin e vajzave, sepse përqëndrimi ishte shumë i madh, ashtu sikurse edhe përgatitja tekniko-taktike.
Arritëm të bënim tre ndeshje shumë të mira, ku dy kundërshtarë ishin shumë seriozë dhe të mirëpërgatitur. Sa i përket takimit të parë ndaj Letonisë, dominuam në çdo aspekt dhe i ushtruam pressing kundërshtarit, duke e zgjidhur ndeshjen për vetëm 30 minuta e pjesën tjetër të lojës veç administruam rezultatin.
Në ndeshjen ndaj Rumanisë, ishim pak të lodhur fizikisht, teksa pavarësisht se rezultati nuk ishte ai që ne dëshironim, kam mbetur disi i kënaqur. Ekipi ynë luftoi deri në fund dhe nuk u dorëzua, por iu kundërpërgjigj kundërshtarit në çdo situatë që ato krijuan. Ndeshja ndaj Armenisë ishte e lehtë në letër për ne, por pas 180 minutash lojë në vetëm 4 ditë dhe me dy kundërshtarë si Rumania dhe Letonia do të bëhej pak e vështirë. Por ia dolëm të fitonim me golin e Tanushit dhe jam i kënaqur sepse loja u zhvillua në gjysmëfushën kundërshtare, çka tregon edhe se jemi në rrugën e duhur dhe jemi në rritje” – tha Krepi, i cili thotë përgëzon ekipin e tij dhe shpreson që në ndeshjet e radhës, ekipi të marrë pikët e plota.
“Shoh që futbolli i femrave ka rritje, si në mënyrën e lojës, ashtu edhe në rezultate. Kombëtarja U-19 arriti 6 pikë në tre ndeshje dhe jemi pretendent kryesor për t’u kualifikuar si ekipi i dytë më i mirë në grupe. Dua t’i përgëzoj dhe t’i falënderoj të gjitha vajzat për lojën e bukur që realizuan, duke dhënë maksimumin e tyre, ashtu sikurse edhe na kishin premtuar. Me punë dhe shumë disiplinë, arritëm të marrim 6 pikë në 3 ndeshje, të zhvilluara në harkun kohor të gjashtë ditëve. Na mbetet të përmirësojmë gabimet që bëjmë, teksa shpresoj që në ndeshjet e radhës të marrim pikët e plota” – tha Kreshnik Krepi për fshf.org.
Vendi i parë i çdo grupi në Ligën B ngjitet automatikisht në Ligën A, por UEFA i ka dhënë mundësinë edhe një ekipi tjetër që do të cilësohet si vendi i dytë më i mirë në të gjitha grupet e Ligës B të ngjitet më lart. Deri më tani, Shqipëria është me ‘një këmbë’ në Ligën tjetër, por mbetet të shihen edhe se si do të jetë klasifikimi i ekipeve të tjera në këtë Ligë, ndeshjet e të cilave do të luhen në muajin nëntor.
Discussion about this post