Degët e Partisë Demokratike Berat, Poliçan e Dimal kanë bërë publike ditën e sotme emrat e firmëtarëve të Kuvendit Kombëtar të PD-së, në 11 dhjetor. Sipas përfaqësuesve të selisë blu, nga dega e Beratit kanë firmosur për në Kuvendin e 11 Dhjetorit, 125 ndër 198 delegatë, përkthyer në shifra, 63% e anëtarësisë së kësaj dege.
Ndërsa nga dega e Poliçanit kanë firmosur 12 nga 34 dhe nga dega Dimal kanë firmosur 21 nga 46. Anëtarja e Kryesisë së PD-së në Berat u shpreh se çdo delegate ka firmosur me vullnet të plotë për Kuvendin e datës 11 dhjetor, teksa e cilësoi këtë lëvizje brenda partisë si të dobishme për këtë forcë politike.
“Çdo delegat formularin e ka plotësuar me dorën e tij dhe e ka firmosur me dorën e tij. Nuk ka pasur as presion dhe as ndikim nga çdonjëri nga ne që jemi marrë me mbledhjen e këtyre firmave. Delegatët e Beratit dhe Anëtarësia e Beratit kanë kërkuar vetë për ta mbledhur këtë Kuvend, duke parë gjendjen në të cilën ndodhet Partia Demokratike sot, mbas disa humbjeve rresht, ku kishte humbur dhe mbështetjen edhe në popull. Ne vendosëm të ishim pjesë e këtij Kuvendi të jashtëzakonshëm që do të zhvillohet në datën 11 dhe të gjithë së bashku në datën 11 do ta shikoni dhe vetë ditën kur do të nisemi të gjithë, në datën 11, për të qenë pjesë e këtij Kuvendi të jashtëzakonshëm. Nuk diskutohet që të gjithë demokratët janë të mirëpritur, kushdo që dëshiron le të vijë. Sido që të dalin rezultatet ne përsëri do të jemi pjesë e PD-së. Kemi qenë që në themelimin e saj dhe do vazhdojmë të jemi, kushdo të jetë në krye të PD-së, qoftë njëri apo nga tjetri nga ata që kërkojnë të zgjidhen kryetarë të PD-së Kjo lëvizje i bën mirë PD-së sepse kemi parë që PD-ja në këto 8 vjet ka qenë goxha e përgjumur.”
Discussion about this post