Miliarderi izraelit Aidan Ofer dhe gruaja e tij, Batia kanë dhënë dorëheqjen nga bordi ekzekutiv i fakultetit të Harvardit në shenjë proteste ndaj mënyrës sesi drejtuesit e universiteteve janë përgjigjur ndaj sulmeve terroriste të Hamasit kundër Izraelit.
“Fatkeqësisht, besimi ynë në udhëheqjen e Universitetit është shkatërruar dhe ne nuk mund të vazhdojmë të mbështesim Harvardin dhe komitetet e tij me mirëbesim”, tha çifti në një deklaratë për CNN.
Aidan Ofer renditet i 80-ti në Indeksin e Miliarderëve të Bloomberg dhe ka një pasuri prej 20 miliardë dollarësh.
Vendimi i Ofers për t’u larguar nga bordi ekzekutiv i Shkollës së Qeverisjes Kennedy të Harvardit vjen pas një zhurme për publikimin e një deklarate anti-izraelite nga një koalicion prej rreth 30 grupesh studentore.
Letra e hapur fajësonte vetëm Izraelin për sulmet e përgjakshme të Hamasit dhe shkaktoi reagime të forta.
Sipas Guardian, disa biznesmenë amerikanë kanë kërkuar që Universiteti të publikojë emrat e studentëve që i përkasin klubeve që kanë nënshkruar letrën, në mënyrë që punëdhënësit e tyre të ardhshëm të dinë qëndrimet e tyre për këtë çështje.
Një nga ata sipërmarrës është Bill Ackman, CEO i Pershing Square, i cili shkroi në një postim në X se ata që mbështesin veprimet e terroristëve duhet ta bëjnë këtë hapur dhe jo të fshihen pas një organizate të madhe.
Letra, e publikuar të dielën e kaluar, thoshte se Izraeli mban përgjegjësinë e plotë për shpërthimin e dhunës, duke shtuar se miliona palestinezë janë të detyruar të jetojnë në një burg të hapur pa asnjë mjet shpëtimi.
Jonathan Nieman, CEO i zinxhirit të restoranteve Sweetgreen, kërkoi gjithashtu që të zbuloheshin emrat e studentëve pas letrës. “Do të doja t’i njihja që të mos i punësoja kurrë këta njerëz ”, i shkruan biznesmeni X.
Megjithatë, vlen të theksohet se kjo letër e veçantë nuk ishte arsyeja kryesore e dorëheqjes së Oferit, siç tha një person me njohuri për këtë çështje për CNN. Sipas këtij burimi, çifti ka qenë kryesisht i pakënaqur nga qëndrimi i anëtarëve të administratës së institucionit arsimor dhe jo nga ai i studentëve.
Discussion about this post