Presidenti Donald Trump nënshkroi një urdhër ekzekutiv të mërkurën, që ka si qëllim ndalimin e sportistëve transgjinorë që të marrin pjesë në sportet për femra. Urdhri, i titulluar “Mbajtja e Burrave Jashtë Sporteve për Femra”, jep mundësi për agjencitë federale të sigurojnë që organizatat që marrin fonde federale të zbatojnë këtë vendim. Gjatë nënshkrimit të tij në Shtëpinë e Bardhë, Trump theksoi se ky urdhër do të ndihmojë për të përfunduar “luftën kundër femrave në sport”.
Urdhri ka ngritur shqetësime lidhur me diskriminimin gjinor, por Shtëpia e Bardhë e ka mbrojtur atë, duke e quajtur në përputhje me ligjin federal që ndalon diskriminimin në programet që financohen nga shteti. Karoline Leavitt, zëdhënësja e Shtëpisë së Bardhë, tha se urdhri kërkon veprime të menjëhershme ndaj shkollave dhe organizatave që lejojnë pjesëmarrjen e transgjinorëve në sportet për femra.
Ky urdhër është nënshkruar në Ditën Kombëtare të Vajzave dhe Grave në Sport dhe është një prej urdhrave të fundit ekzekutiv të Trump, që kanë si objektiv çështjen e të drejtave të transgjinorëve. Gjatë fushatës për rizgjedhje, Trump pati premtuar që do të ndërmarrë masa për të eleminuar “çmendurinë transgjinore”, por pa dhënë detaje të mëtejshme.
Urdhri ekzekutiv parashikon që Departamenti i Arsimit mund të penalizojë shkollat që lejojnë pjesëmarrjen e transgjinorëve në sportet për femra, dhe shkollat që shkelin këtë rregull mund të humbasin financime federale. Një tjetër masë është hetimi i institucioneve për zbatimin e këtyre rregullave, si dhe një paralajmërim për Komitetin Olimpik Ndërkombëtar, për të siguruar që transgjinorët nuk do të lejohen të marrin pjesë në sportet për femra në Lojërat Olimpike të 2028 në Los Anxhelos.
Discussion about this post