“Unë mbijetova sepse kisha Zotin në anën time”. Kështu deklaroi Donald Trump teksa pranoi zyrtarisht nominimin për Shtëpinë e Bardhë në konventën republikane në Milwaukee dhe, në fjalimin e tij të parë pas tentativës për vrasje ndërsa siguroi se do të sillte paqen në Amerikë dhe botë.
Ai foli gjithashtu për një “fitore të pabesueshme” në zgjedhjet e 5 nëntorit, duke premtuar “katër vitet më të bukura në historinë” e SHBA-së, nëse rikthehet në Shtëpinë e Bardhë.
“Katër muaj nga tani, ne do të kemi një fitore të pabesueshme dhe do të fillojmë katër vitet më të mëdha në historinë e vendit tonë ”, tha Trump. “Së bashku, ne do të hapim një epokë të re sigurie, prosperiteti dhe lirie për qytetarët e çdo race, feje apo ngjyre. Unë po kandidoj për të qenë president për të gjithë Amerikën, jo gjysmën e Amerikës, sepse nuk ka fitore për gjysmën e Amerikës,” tha ai.
Pasi përsëriti premtimet për ngritjen e murit në kufirin jugor, vendosjen e tarifave në dogana ndaj mallrave të huaja, rritjen e nxjerrjes së naftës nga nëntoka, ai e kritikoi drejtpërsëdrejti presidentin Biden, emrin e të cilit u zotua se nuk do ta përmendte më gjatë fjalimit.
“Nëse do të merrnim dhjetë presidentët më të këqinj amerikanë, ata së bashku nuk do të kishin shkaktuar dëmin që ka shkaktuar Biden-i”, tha ai.
“Së bashku do të jemi sërish një komb madhështor”, tha ai. “Qoftë nëse më keni mbështetur apo jo… Me shumë përulje ju kërkoj të jeni të lumtur për të ardhmen e vendit tonë”, tha ish-presidenti Trump.
Ai premtoi veprime të vendosura për të luftuar inflacionin. “Duhet t’i lehtësojmë ekonomikisht qytetarët tanë, duke ja filluar që nga dita e parë. Do t’i ulim çmimet dhe do ta bëjmë Amerikën sërish të përballueshme”, tha ai.
Sipas Trump, Biden do të fillojë “Luftën e Tretë Botërore” dhe foli për një “pushtim” të emigrantëve nga kufiri jugor. Trump u zotua gjithashtu se do t’i japë fund imigracionit të paligjshëm që nga “dita e parë” e mandatit të tij të ri të mundshëm duke “mbyllur kufirin”, dhe se do të përfundojë ndërtimin e murit kundër imigracionit në kufirin me Meksikën.
“Unë do t’i jap fund krizës së emigracionit të paligjshëm duke mbyllur kufijtë tanë dhe duke përfunduar murin ,” siguroi kandidati republikan.
Në të njëjtën kohë, ai premtoi të shpëtojë “vendin nga qeveria e paaftë dhe e dështuar” e demokratit Joe Biden, duke përsëritur se Amerika është një “komb në rënie”.
Trump tha gjithashtu se krizat ndërkombëtare si luftërat në Ukrainë dhe Gaza nuk do të kishin ndodhur nëse ai do të ishte president.
“Së bashku do të rivendosim vizionin, forcën, kompetencën dhe do të kemi një gjë të quajtur sens të përbashkët që merr në fakt shumicën e vendimeve tona,” tha kandidati republikan.
Discussion about this post