Ministri turk i Mbrojtjes Hulusi Akar nisi një sulm të ri kundër Greqisë, duke akuzuar për provokim dhe sabotimin e dialogut dhe zgjidhjen paqësore të problemeve midis dy vendeve në Mesdheun Lindor.
“Fqinjët tanë grekë po bëjnë gjithçka që munden për të provokuar dhe sabotuar këto përpjekje me veprimet dhe retorikën e tyre” tha Hulusi Akar.
“Unë dua t’i kujtoj ata se kjo nuk është mënyra e duhur. Ju nuk do të arrini askund me këtë retorikë dhe këto veprime provokuese. Ajo që duam është e drejta ndërkombëtare. Si mund të mohoni klauzolat e traktateve ndërkombëtare?
Ne jemi për të drejtën ndërkombëtare, për marrëdhëniet e mira fqinjësore, por kurrë nuk do të lejojmë që të drejtat e vendit tonë, të kombit tonë të shkelen, ne kurrë nuk do të lejojmë që ato të plotësohen. Të gjithë duhet ta dinë këtë” tha Akar.
Hulusi Akar pretendoi se disa civilë dhe ushtarë kishin bërë kohët e fundit deklarata në Greqi “që përmbajnë iluzione historike“, duke deklaruar se historia turke ishte shumë e qartë dhe transparente.
Ministri turk tha gjithashtu se Greqia nuk duhet të përpiqet të portretizojë problemet e saj me Turqinë si një problem Turqi-SHBA, Turqi-NATO, Turqi-BE, duke shtuar se “kjo nuk ndihmon askënd. Dëmi më i madh do të ndodhë në Greqi, për popullin grek” tha Hulusi Akar.
Mediat greke njoftuan pak ditë më parë se në fund të muajit maj në Athinë pritet që të shkojë ministri i Jashtëm turk, i cili do të pritet në një takim nga homologu i tij, Dendias që ishte në Turqi në Prill. Marrëdhënia mes dy vendeve është e tensionuar për shkak të cështjes së detit.
