U hodh nga shkëmbi në det, merr dëmtime të rënda në kokë 16-vjeçari

Një tjetër ngjarje jo e këndshme ka ndodhur në plazhet tona.

Dy turistë janë lënduar në Himarë. Mësohet se ata kanë janë hedhur nga shkëmbi në det.

Por, si pasojë e rënies, dy turistët kanë marrë lëndime. Një 16-vjeçar ka marrë dëmtime të rënda në kokë.

U dëmtua edhe shoku i tij 17 vjeç, që u fut në det për të ndihmuar 16-vjeçarin.

Adoleshenti 16-vjeçar është nisur me urgjencë drejt spitalit në Tiranë. Kjo pasi ka marrë dëmtime shumë të rënda.

“Policia e Himarës iu jep ndihmën e parë 2 pushuesve të cilët aksidentalisht ishin dëmtuar pasi ishin hedhur nga një shkëmb në det.

Në Llaman, shtetasit D. K. dhe K. Xh., janë afruar te disa shkëmbinj dhe pasi kanë zbritur nga mjeti lundrues Jet Ski, kanë hipur në shkëmbinj, për t’u hedhur në det.       

Shtetasi K. Xh., 16 vjeç, banues në Tiranë, kur është hedhur në det, ka pësuar dëmtime të rënda  në fytyrë dhe në kokë, për shkak se ka rënë afër shkëmbit. Në këtë moment është hedhur në det edhe shoku i tij, shtetasi D. K., 17 vjeç, banues në Tiranë, për ta ndihmuar, por nuk ka mundur dot sepse është dëmtuar edhe ai vetë.  

Shtetasi D. K. ndodhet jashtë rrezikut për jetën, ndërsa shtetasi K. Xh. po transportohet me helikopter në drejtim të Tiranës, për ndihmë mjekësore më të specializuar.  

Në vendngjarje ndodhen shërbimet e Policisë vendore dhe ato të Policisë Kufitare, si dhe grupi hetimor, me qëllim dokumentimin e plotë të rrethanave të ngjarjes.  

Ndërkohë, është shoqëruar në Komisariat dhe po merret në pyetje pronari i mjeteve lundruese, shtetasi R. P”, njofton policia.