Elisabeta Imeraj, ish-kryeprokurore e Tiranës, duke komentuar operacionin antridrogë që çoi në arrestimin e mbi 200 personave, tha se në këtë fazë u arrestuan shpërndarësit, por duhen gjetur furnizuesit. Në emisionin “Open”, Imeraj tha se ky operacion është rezultat i një veprimtarie hetimore.
“Organet shtetërore, përfshirë policinë, prokurorinë e të gjitha me radhë janë krijuar për të patur vullnet për të tilla ngjarje.
Çdo veprimtari kriminale që goditet pavarësisht se çfarë rangu është, mbetet për t’u vlerësuar. Është shumë e rrezikshme të mendohet se mbi 200 persona ishin të gatshëm që të furnizonin nxënës të klasave të ndryshme dhe studentë me lëndë narkotike.
Fakti që janë caktuar masa sigurimi më parë do të thotë që veprimtaria kriminale ka qenë në mbikqyrje dhe në ndjekje. Agjentë të policisë janë sjellë si blerës dhe kanë arritur të gjejnë kontakt.
Nëse do të arrihet të zbulohet se ku bëhet furnizimi me këtë lëndë narkotike, atëherë do të arrihet më tej”, u shpreh Imeraj.
Discussion about this post