Një numër i madh godinash u shembën në jug të vendit, të cilat u shoqëruan dhe me konflikte të pronarëve me përfaqësuesit e IKMT. Në lidhje me këto aksione, bëhet me dije se në total janë shembur 60 objekte pa leje, sipas asaj çka deklaron ministri Bledi Çuçi. Ai i ka cilësuar zaptues, të gjithë pronarët e këtyre godinave, madje duke shkruar se gjithçka ishte ndërtuar pa leje.
Ministri pohon se aksioni do të vijojë në të gjithë jugun, për shembjen e objekteve pa leje, por sipas pronarëve në jug, shembjet janë selektive. Pak ditë më parë, në shembjet që u bënë në bregdetin e Jalës, pati një sërë përplasjesh mes pronarëve të objekteve që u shembën dhe përfaqësuesve të IKMT, duke degjeneruar deri në sulmin me gurë. Atë periudhë, raportohej se objektet e shembura ishin me dokumentacionin e nevojshëm, por për Inspektoratin Kombëtar të Mbrojtjes së Territorit, dokumentet që ata posedonin ishin të parregullta.
Gjithashtu ka një numër të madh objektesh në vijën bregdetare, të cilat nuk janë shembur, madje duket se janë favorizuar nga qeveria.
Në fillim të aksionit u njoftua nga qeveria, se asnjë ndërtim nuk do të tolerohej, madje u raportuan me qindra godina të cilat ishin në listat e IKMT, në përfundim raportohet se janë shembur vetëm 60 të tilla.
