Dita e djeshme ishte një tragjedi për familjen e kryekamarierit Gazment Kurmaku, i cili humbi jetën pasi një klient e vrau teksa po bënte detyrën, si çdo ditë.
Sot ai u përcoll në banesën e tij ku të afërmit shprehen se kanë mbetur të shokuar nga kjo ngjarje e ndërsa e përshkruajnë Kurmaku si një njeri të ndershëm e shumë punëtor.
“Jam shumë e pikëlluar, por nuk kemi ça bëjmë. U bë kjo punë, ka qenë i ndershmi i dynjasë nga të gjitha anët, nuk ka çfarë të them jam shumë e dërrmuar. Shteti të interesohet që ta arrestojnë, siç vrau ta vrasin”.
“Fatkeqësi më të madhe se kjo nuk besoj se ka se shkon tjetri për të punuar që të ushqehet dhe të shkojë tjetri ta vrasë është diçka tepër e rëndë, më të rëndë e kanë prindërit që po përcjellin fëmijën e tyre dhe mendoj që është tepër, tepër e rëndë. Gjithë jetën ka qenë kamerier te Rozafa, ka qenë një i mirë, punëtor, i rregullt në punë, autori duhet kapur dhe të vihet para përgjegjësisë dhe të marrë dënimin maksimal”
“Ishte shumë i sjellshëm, punëtor, kishte katër ditë në vdekje klinike, e pritshmit, edhe doktorët ia prenë shpresën që në fillim. S’ka pasur më parë probleme të kësaj natyre, as nuk u mor vesh se ca ndodhi me autorin, se çfarë kërkojmë nga shteti e dimë të gjithë”, thonë të afërmit.
Gjashtë ditë më parë, në datë 2 Tetor Gazment Kurmaku, i cili ishte shef shërbimi në një kompleks në Labinot në dalje të Elbasanit në drejtim të qytetit të Librazhdit, u qëllua me grushte dhe sende të forta nga një klient, i cili nuk pranoi faktin që tavolinë ku ishte ulur ishte rezervuar.
Erjon Llapushi, kishte shkuar si klient në restorant, por 50-vjeçari që ishte në krye të detyrës si shef i kamarierëve e ka njoftuar se tavolina ku ishte ulur ishte e rezervuar.
Llapushi ka kundërshtuar dhe debati ka agravuar. Po sipas burimeve nga policia e Elbasanit, që rastin e ka njoftuar si sherr banal, Llapushi e ka goditur Gazment Kurmakun me grushte dhe sende të forta. 50-vjeçari ka rënë duke përplasur kokën me një pjesë betoni duke përfunduar në gjendje kome.
Ka qenë kompania e cila është përgjigjur pas interesimit për sherrin e ndodhur mbrëmjen e 3 tetorit në Elbasan, për një tavolinë të rezervuar, duke konfirmuar kështu vendin e ngjarjes.
Pas ndihmës së parë në spitalin e Elbasanit, 50-vjeçari u transportua në Tiranë ku nga raportimet e fundit u tha se ndodhej në vdekje klinike, e ndërsa dje, pavarësisht përpjekjes së mjekëve, ai ndërroi jetë.
