Këtë të enjte, klubet shqiptare nisin aventurën e tyre në UEFA Europa Conference League, kompeticioni i tretë, për klube, i UEFA-s. Objektivi primar është, këtë sezon, që të korrigjohen gabimet e sezonit të kaluar, me Tiranën, Egnatian dhe Vllazninë, që do të kërkojnë, më shumë se, thjesht, kalimin e turit të parë kualifikues.
KF TIRANA
Duke e nisur nga rekordmenët e Shqipërisë, kryeqytetasit e Orges Shehit, presin, në orën 20:00, në “Air Albania Stadium”, skuadrën e Dinamo Batumit, me gjeorgjianët që janë klubi, i cili po bën revolucion në futbollin e ish-republikës sovjetike. Ky duel, pritet të jetë i komplikuar për nënkampionët e Shqipërisë, të cilët kanë pësuar disa ndryshime në organikë. Shehi do kërkojë të mos përsërisë performancën negative të vitit të kaluar, me Tiranën, që u eliminua nga kupat europiane, pas 4 disfatash rresht (dy humbje në Champions, përballë Dudelange, si dhe dy humbje përballë Z. Mostar, në Conference).
EGNATIA
Më herët, në 17:00, Egnatia e Rrogozhinës, debuton në Europë, në Jerevan të Armenisë. Fituesit e Kupës së Shqipërisë do të përballen me Ararat-Armenia, klub që ka në total 14 ndeshje në kompeticionet europiane. Trajneri i Egnatias Edlir Tetova, është treguar i kujdesshëm me deklaratat e tij, duke u shprehur se shanset e të dyja skuadrave për të kaluar turin janë 50 me 50. Sezonin e kaluar, Ararat e mbylli kampionatin në pozitën e tretë me 76 pikë, duke shfaqur, një futboll solid dhe të bukur, gjë që e bën një problem për rrogozhinasit, të cilët duhet të jenë 100% të përqendruar nëse duan të largohen me rezultat pozitiv nga Kaukazi.
VLLAZNIA
E fundit, por jo nga rëndësia, është Vllaznia e Shkodrës. “Djepi i futbollit shqiptar”, udhëton (në mënyrë të ligjshme) drejt Mbretërisë së Bashkuar, për t’u përballur në Belfast, me skuadrën e Linfield. Trajneri Migen Memelli pritet t’i besojë në këtë takim, që do të startojë në orën 20:45, disa prej prurjeve të reja, megjithatë boshti mbetet ai i sezonit të kaluar. Në letër, 56 herë kampionët e Irlandës së Veriut, janë favoritë për kalimin në turin e dytë, megjithatë shkodranët do të bëjnë të pamundurën për të thyer çdo parashikim, falë edhe mbështetjes së madhe që pritet të kenë në stadiumin “Uindsor Park”, nga shqiptarët banues në ishullin e Irlandës e jo vetëm./m.b /gijotina.com
Discussion about this post