Rektori i Universitetit të Mjekësisë, Arben Gjata thotë se largimet masive të mjekëve dhe kërkesat e paketa të studentëve të Mjekësisë për specialitetin mjek familjeje rrezikojnë që të boshatisin qendrat shëndetësore.
Sipas tij nga 40 kuota, vetëm 5 studentë kanë aplikuar për mjek familjeje, ndërsa shqetësuese është edhe mungesa e mjekëve të urgjencës.
“Ne kemi shumë nevojë për disa specialitete siç është mjeku i urgjencës dhe mjekësia e familjes. Në sistemin shqiptar shumica e mjekëve nuk janë mjek familje por janë mjek të përgjithshëm që kanë punuar ndër vite si mjek familje. Dhe gjithashtu sistemi urgjencës, pra duam të formojmë edhe mjekë të urgjencës. Te mjeku familjes kishim 40 kuota dhe u plotësuan vetëm 5 ndërsa te urgjenca kanë qenë 15 kuota dhe u plotësuan 5 gjithashtu” – u shpreh Gjata.
Si zgjidhje, Rektori i Universitetit të Mjekësisë Arben Gjata thotë se gradualisht do të rriten kuotat për disa degë të mjekësisë.
“Unë besoj se kuotat gradualisht do ti rrisim, ne projektojmë rreth 500-600 kuota në vit duhet ti ketë mjekësia për të përballuar qoftë lëvizjen e mjekëve jashtë vendit qoftë dhe për të plotësuar nevojat në rritje të sistemit qoftë atij publik qoftë sistemit privat” – tha rektori.
Një tjetër zgjidhje është parashikuar përmes shtrirjes së degëve të Universitetit të Mjekësisë, edhe në Durrës dhe Elbasan.
“Mund të hapim 50 kuota me një program të përbashkët studimi me Universitetin e Durrësit dhe 50 kuota të tjera me program të përbashkët studimi me Universitetin e Elbasanit ndërsa 50 kuota të tjera do ti shtojmë ne për arsye sepse parashikojmë që në vitin tjetër të fillojë ndërtimi i godinës së re aty ku sot është 6-katëshi i cili i rrit shumë hapësirat e Universitetit” – tha Gjata.
Ndërsa sa i përket situatës epidemiologjike, Gjata bën thirrje për vaksinim, duke argumentuar se ndonëse këtë vit kemi shifra të njëjta infektimesh, hospitalizimet dhe fatalitete kanë rënë me rreth 50%, për shkak të imunizimit.
Discussion about this post