Pamjet tronditëse të publikuara nga mensa e studentëve të Akademisë së Sigurisë në Tiranë kanë ngritur shqetësime serioze për kushtet higjeno-sanitare dhe sigurinë ushqimore në institucion. Në një nga shishet e uthullës së përdorur për ushqim dallohen qartë krimba, ndërsa studentët denoncojnë mungesë standardesh në ushqimin që konsumohet çdo ditë në mensë. Deri më tani nuk ka pasur një reagim zyrtar nga drejtuesit e institucionit lidhur me rastin.
56 studentë të Akademisë së Sigurisë përfunduan në spital me dyshime për helmim ushqimor, pasi konsumuan drekën e shërbyer në ambientet e institucionit. Studentët shfaqën simptoma si të përziera, dhimbje barku dhe të vjella, ndërsa morën ndihmë mjekësore në urgjencë dhe më pas u larguan jashtë rrezikut për jetën. Sipas të dhënave paraprake, ushqimi furnizohej nga kompania private “SORI-AL”, e cila kishte kontratë për shpërndarjen e tre vakteve ushqimore në ditë për studentët e Akademisë.
Burime zyrtare dhe dokumente prokurimi bëjnë me dije se kompania “SORI-AL” SHPK rezulton e regjistruar në emër të Alma Tafanit, bashkëshortes së Nikolin Jakës, emri i të cilit lidhet me biznesin e kateringut në disa institucione shtetërore. Në lidhje me helmimin ushqimor, Komisariati nr. 1 arrestoi kuzhinierin Kujtim Ballgjini, 52 vjeç, dhe teknologen Kristjana Plaka, 23 vjeçe, të dy punonjës të kompanisë, ndërsa administratorja Alma Tafani është shpallur në kërkim. Specialistë të Institutit të Shëndetit Publik, Agjencisë Kombëtare të Ushqimit dhe strukturave të krimit ekonomik kanë marrë mostra ushqimore dhe po kryejnë hetime për të verifikuar shkeljet e mundshme dhe përgjegjësitë mbi rastin.
Discussion about this post