Partia Bashkimi për të Drejtat e Njeriut e drejtuar nga Vangjel Dule do të jetë në koalicion me Partinë Demokratike, duke garuar në një listë të përbashkët në zgjedhjet parlamentare të 11 Majit.
Kjo gjë u konfirmua nga vetë Vangjel Dule, i cili në një konferencë për mediat sqaroi se ende nuk ka një marrëveshje të shkruar me demokratët për të qartësuar se si do ndahen kandidatët brenda koalicionit.
“PBDNJ e di se ku e ka influencën e vet më të madhe dhe këto janë qarqet e Vlorës, Gjirokastrës, Korçës dhe më pas Tirana. Kështu që dhe preferencat do të ishin me të njëjtën renditje prioritarizimi, por gjithmonë në koalicion nuk je dhe nuk vendos vetëm. Do të jetë objekt i një vendimmarrje të përbashkët”, u shpreh Vangjel Dule.
Ndërkohë, kreu i PBDNJ-së e kishte të qartë panoramën se ku do të preferonte për të garuar vetë, duke përmendur Vlorën.
“Qarku preferencial ua thash dhe isha i qartë, aty ku ke influencën më të madhe dhe kjo dihet që është qarku i Vlorës”, tha Dule.
I pyetur nëse bashkëpunimi i Partisë Demokratike me PDIU-në e Shpëtim Idrizit është vijë e kuqe, Dule nuk e pohoi një gjë të tillë.
“Janë vlerat evropiane të cilat janë të mirëpërcaktuar, kushdo që u shërben këtyre vlerave është i mirëpritur. Kushdo që është jashtë parametrave evropiane në programet dhe pretendimet e veta, nuk ka nevojë që të vendos dikush kusht, pasi funksionon dhe vetëpërjashtimi”, u shpreh Dule
Discussion about this post