Varrezat në Vuno të Himarës, Vasili publikon foto: Çfarë gjendje e mjeruar, turp për Bashkinë

Nënkryetari i Lëvizjes Socialiste për Integrim, Petrit Vasili, ka ngritur shqetësimin në lidhje me gjendjen e varrezave të Vunoit në Himarë.

Me anë të një postimi në rrjetin social Facebook, Vasili u shpreh se Bashkia e Himarës i ka hequr të ndjerëve edhe të drejtën e fundit për tu prehur në një vend dinjitoz.

“Çfarë gjendje e mjeruar në varrezat e Vunoit, turp për Bashkinë e Himarës! Bashkia e Himarës gjoja bëri një pastrim të tyre, por realisht fotot flasin vetë, ku e kundërta skandaloze ka ndodhur. Mbeturina gjithfarësh dhe shkurre të hedhura mbi varre ky është rezultati i turpshëm i gjoja pastrimit. Në ato varreza prehen burra e gra dinjitoze, që me jetën dhe veprën e tyre, i kanë shërbyer pa fund vendit, fshatit dhe familjes me modesti e thjeshtësi pa kërkuar asgjë. Edhe të vetmin detyrim, që ata të prehen në mënyrë dinjitoze, ua përdhos një Bashki e Kryetar, që s’kanë asnjë lidhje me krenarinë e meritat e jashtëzakonshme të Bregdetit, por Bregdetin e kanë thjesht një plaçkë tregu për pazaret e tyre. Respekt pa fund kujtimi të atyre që prehen në varrezat e fshatit Vuno dhe përbuzje për këtë Bashki turpi!”, shkruan Vasili.