Papa Françesku u dhuroi 15,000 akullore të burgosurve në Romë për t’i ndihmuar ata të freskoheshin, pasi kjo ka qenë një nga verat më të nxehta të regjistruara në Itali. The Guardian shkruan se akulloret u dorëzuan në dy burgjet e Romës, Regina Coeli në qendër të qytetit dhe Rebibbia në periferi, nga Kardinali Konrad Krajewski.
Në një deklaratë, Vatikani tha se zyra bamirëse e Papës nuk shkoi me pushime këtë verë dhe në vend të kësaj, vullnetarët e Vatikanit e kaluan kohën e tyre duke vazhduar t’i përkushtoheshin, dy prej shtatë veprave të mëshirës: vizitë të burgosurve dhe ngushëllimin e të pikëlluarve.
Në qershor, rreth 20 të burgosur nga burgu Rebibbia u takuan me Papën para se t’i bashkoheshin atij për një vizitë në Muzetë e Vatikanit. Zyra bamirëse e Vatikanit gjithashtu mori në shëtitje njerë të pastrehë për një pasdite relaksi. Për më tepër, Vatikani ka siguruar më herët teste falas për Covid-19 dhe vaksinime për të pastrehët e Romës dhe ata në varfëri.
