Ka kaluar një javë tashmë nga vdekja e katër rusëve në Shqipëri, Sergei, Natalia, Ekaterina dhe Nikita, e jo vetëm që nuk është zbuluar shkaku, por Instituti i Shëndetit Publik ka kthyer mbrapsht provat e prokurorisë e policisë pasi mostrat e ujit e klorit janë marrë jo në përputhje me ligjin.
Shefi departamentit të ujit dhe mjedisit në Institutin e Shëndetit Publik, Arben Luzati në një komunikatë për mediet deklaroi se ISHP ka kthyer pas provat materiale të marra në ujin e pishinës dimërore dhe klorin e përdorur në të.
Luzati sqaroi se provat e marra nga oficerët e policisë gjyqësore nuk ishin në formën e kërkuar nga ligji. Sipas tij, tashmë mostra e ujit dhe klorit janë marrë ditën e sotme nga përfaqësues të ISHP-së.
“Dhe mostra do të merret sipas kësaj rregullore dhe sipas këtij standardi. Për të qenë transparentë, oficerët e policisë gjyqësore kishin sjellë mostrën jo sipas kërkesave të rregullores. Kishin marrë mostrat vetë, kjo mënyrë duhet të rregullohet njëherë e mirë dhe të ndahen detyrat e secilit”- u shpreh Arben Luzati
Këto prova të marra sot, me 5 ditë vonesë, hedhin ende dyshime se kjo vrasje e pretenduar nga Prokuroria e Kavajës është bërë në një formë perfekte duke humbur çdo gjurmë. Pavarësisht çdo versioni që flitet për vdekjen e katër rusëve, ISHP pret t’i vendoset në dispozicion uji i pishinës dhe menjëherë pas kësaj të japë një përgjigje.
Ndërkohë Prokuroria e Kavajës tha se trupat e katër viktimave do të qëndrojë në morg deri sa të ketë një përgjigje nga mjekësia ligjore për shkakun e vdekjes.
Të gjitha këto veprime ngrenë pikëpyetje mbi mënyrën si është administruar vendngjarja dhe a kanë apo jo kapacitete institucionet shqiptare për të kthyer përgjigje shkencore dhe të pakontestueshme mbi vdekjen e rusëve që u gjetën të vdekur nga recepsionistja gati një orë pasi kishin hyrë në pishinën dhe xhakuzin e rezortit në Qerret.
