Kryebashkiaku Erion Veliaj ka braktisur mbledhjen e Këshillit Bashkiak, e cila nisi me debate mes tij dhe këshilltarëve të opozitës.
Pasi prezantoi disa nga projektet e Bashkisë, Veliaj tha se Tirana nuk mund të lihet në dorë të zhulsave, duke vijuar mbrojtjen për inceneratorin e Tiranës, edhe pse ai nuk ekziston.
Por Veliaj tha se në këtë incenerator edhe Bashkia e Kavajës po depoziton mbetjet, madje kanë shkuar me brekë në mes të sezonit turistik, për të paguar detyrimet, pasi nuk mund të lihen plehrat rrugëve.
“Tirana është një qytet më i pastër, nuk mund t’ia lemë në dorë zhulsave. Shikoni kavajën, shkuan me brekë e recipeta e bënë ato pagesat”, tha Veliaj, teksa debatonte me këshilltarë të opozitës.
Tedi Blushi, këshilltari i Partisë së Lirisë, duke replikuar me Veliajn, i tha “Erion Qelia duhet të merresh i pandehur dhe të dalësh para drejtësisë”.
“Mega-Firma e paligjshme që ndryshoi fatin dhe i dha jetë kësaj vepre korruptive të inceneratorit të Tiranës, është e juaja pa mbledhur Këshillin Bashkiak dhe duke shkelur ligjin e pushtetit lokal.
Me këtë firmë të paligjshme, ti Erion Qelia fute në borxh të gjithë qytetarët e Tiranës për 30 vite në shërbim të mafias së inceneratorëve.
Erion Qelia dili “për zot” firmës!”, tha Blushi.
Madje, ai akuzoi kryebashkiakun se nga frika që ka për tu përballur me qytetarët e ka mbushur sallën e këshillit me truproja duke mos lejuar as invelidët me karrocë të marrin pjesë në mbledhje, ndërsa gazetarët i ka lënë jashtë dyerve të Bashkisë.
“Ju jeni parti e lodhur, u rrahët në zgjedhje si gamori n’dahon”, tha Veliaj, në replika me këshilltarët.
Në vijim ai i quajti ca hipokritë ata që flasin nga mëngjesi deri në darkë dhe veprojnë ndryshe nga sa thonë. “Ju imitoni Saliun nga mëngjesi deri në darkë”, tha Veliaj, duke shtuar “do shkoni nga humbja në humbje, i keni lodhur njerëzit, ju ka shkuar kokoshi një felë”.
“Sa herë që flas unë për këto të Sigurimit të Shtetit, ju që e keni kryetarin sigurims jeni të shqetësuar. Ai që spiunonte shokët është bërë kryetar i partisë së tyre dhe sa herë që flasim për sigurimin këta të Ilir Metës hidhen pupthi. Merreni me qetësi, me sportivitet. Të fala sigurimsit. I kam thënë Ilir Metës: Sigurimsat nuk kanë të ardhmen”, tha Veliaj, duke replikuar me Blushin dhe Braimllarin.
Discussion about this post