Kryetari i Bashkisë Tiranë, Erion Veliaj, po bënë shpenzime të pakontrolluara, si këto me koshat dekorativë! Bëhet fjalë për disa kosha të vegjël, të zbukuruar, që vendosen nëpër trotuare. Kur në fakt çdo kosh në rrugët e Tiranës është i tejmbushur dhe pastrohen kur të kujtohet Eco-Tirana, si firmë përgjegjëse e bashkisë për pastrimin e qytetit. Kujtojmë se kjo është një shoqëri aksionere mes bashkisë dhe ortakëve italianë.
Pavarësisht se qytetarët paguajnë taksa për punën që duhet të kryejë Eco-Tirana, Veliaj kërkon edhe disa para të tjera shtesë dhe ia ngarkon Drejtorisë së Gjelbërimit. Tenderi është publikuar me datë 5 qershor 2023 në Agjencinë e Prokurimeve Publike.
Ky tender ka si objekt “Shërbime pastrimi të koshave dekorative” 12 muaj nga data e nënshkrimit te kontratës dhe i është vënë në dispozicion fondi me vlerë 200 milionë lekë. Janë shumë lekë, që nuk duhet të tenderoheshin, sepse ka një kompani që është e ngarkuar për këtë punë. Kontrata është nënshkruar me 25 maj me firmën “GERARD-A” SHPK, në pronësi të Sokol Kryeziut.
Ky i fundit e ka marrë me “pahir” këtë tender, sepse nuk ka pasur asnjë firmë tjetër që ta “konkurronte”. Në dokumentin e publikuar nuk regjistrohet asnjë konkurrent apo emri i ndonjë firme që mund të jetë skualifikuar përballë Kryeziut. Kështu, tregon qartë që Veliaj ia ka falur këtë tender, duke shtuar një barrë tjetër mbi taksapaguesit shqiptarë.
Sakaq, kujtojmë se në mars të këtij viti Bashkia Tiranë shpenzoi 526 milionë lekë për të blerë këto kosha dekorativë.
Ndërkohë, në dokumente vihet re se firma që do të fitojë, do të ketë kohë 3 vjet që të vendosë këto kosha në qytet. Fakt që tregon edhe njëherë se tenderi është fasada e radhës për të xhiruar lekë nga fondet e bashkisë dhe për të përgatitur propagandën për zgjedhje. Pra, pa filluar akoma nga puna vendosja e koshave, Veliaj shpenzon për pastrimin e tyre.
Theksojmë se të njëjtën skemë Veliaj e përdori për Sheshin Skënderbej, të cilin, bashkë me parkimin nëntokësor ia dha kompanisë së oligarkut Shkëlqim Fusha.
“GERARD-A” SHPK është firma që ka siguruar autobusët elektrik (hibrid) në Tiranë për transportin publik në linjën e Unazës. Këto autobusë më shumë kanë vënë në rrezik jetën e qytetarëve me aksidente se sa kanë ndihmuar në përmirësimin e cilësisë së ajrit.
Kujtojmë se një autobus i “GERARD-A” SHPK u përplas me një makinë pranë ‘Shallvareve’ dhe përfundoi mbi lumin Lanë, ku mbetën të plagosur disa persona. Ndërkohë në fillim të këtij viti një tjetër autobus i kësaj linje u përplas me 7 makina pranë ‘Tajvanit’ dhe mbetën të plagosur 6 persona.
Lexo edhe: Do kujdesen për koshat dhe stolat, Veliaj iu fal 2 mld lekë dy miqve të tij
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post