Teksa këtë të martë u zhvillua protesta e nëntë para Bashkisë së Tiranës për arrestimin dhe dorëheqjen e Erion Veliajt, ky i fundit vijon të propagandojë “punët e mira”.
Në një postim në rrjetet sociale, ai shpërndan pamje nga asfaltimi i një rrugë në Liqenin e Farkës, një zonë, sipërfaqja e gjelbër e së cilës është tkurrur nga ndërtimet e vilave luksoze që po kryhen aty.
“Ekipi i terrenit po punon me ritme të shpejta për të sistemuar çdo cep të qytetit tonë! I japim vlerë njësoj si qendrës, ashtu edhe periferisë. Farka tashmë destinacion për kryeqytetasit dhe turistët”, shkruan kryebashkiaku, i cili ka qenë në qendër të kritikave për lejet e firmosura në rreth liqenit të Farkës, ku ndërtimet po betonizojnë zonën e gjelbër, duke e kthyer në rezidenca pasanikësh.
Në këtë mënyrë, investimet që shkojnë në favor të oligarkëve, Veliaj i paraqet si “investime turistike”. Të njëjtën skemë ka ndjekur edhe shefi i tij politik Edi Rama, i cili ka hartuar politika të shumë kundërshtuara – u ka falur sipërfaqe të konsiderueshme toke “investitorëve strategjikë” dhe si dhe pagesë të taksave ndërtuesve përmes akteve të posaçme ligjore. E justifikuar gjithnjë “në emër të turizmit”, nuk kanë munguar as miliardat e dhëna me tendera në emër të turizmit, por që ‘çojnë ujë’ në mullarin e resorteve të oligarkëve.
I tillë cilësohet nga banorët e fshatrave përgjatë lumit të Vlorës edhe projekti për ndërtimin e Ujësjellësit të Himarës. Banorët, të cilët kanë zhvilluar protesta të vazhdueshme, shprehen se devijimi i lumit siç parashikon projekti, do ti lërë ata pa ujë duke shkatërruar tokat bujqësore e ekosistemin nga njëra anë, ndërsa uji do të rrjedhë bollshëm në resortet e oligarkëve.
Ngjashëm, edhe kryebashkiaku i Tiranës, nën hetim nga SPAK dhe i akuzuar për afera të shumta korruptive, parqet investimet pranë rezidencave të oligarkëve si “turistike”, teksa flet për miliona pemë të mbjella, por në realitet shton sipërfaqet e betonizuara.
Discussion about this post