Shqipëria përballet me Poloninë mbrëmjen e sotme në “Air Albania”, një ndeshje që pritet të dhurojë emocione të shumta.
Takimi i sotëm mund të rezultojë historik për kombëtaren shqiptare, e cila në rast fitoreje ndaj Polonisë, pothuajse është me një këmbë në Euro2024.
Ndaj dhe sfida e sotme konsiderohet si vendimtare për kuqezinjtë, të cilëve mund t’i duhet edhe pak fat, përveçse duhet të tregojnë formën e tyre më të mirë.
Mungesa e vetme, ashtu si në Çeki, është ajo e Qazim Laçit, i cili kaloi një gjendje gripale.
Trajneri brazilian ka dilema vetëm për krahun e majtë të sulmit, aty ku duket se ka një balotazh mes Seferit dhe Uzunit, ndërsa Cikalleshi në qendër dhe Asani në të djathtë nuk do të lëvizin.
Gjithashtu, trajneri mund t’i japë një fanellë titullari mbrojtësit të krahut të djathtë, Ivan Balliu, pasi i duhet më shumë eksperiencë ndaj Polonisë, me Hysajn që pritet të kalojë nga e majta në vend të Mario Mitajt, edhe pse ky i fundit zhvilloi një ndeshje për t’u admiruar në Pragë.
Pjesa tjetër e ekipit nuk do të ndryshojë.
Pritet që Berisha ta nisë që nga minuta e parë në portë, Gjimshiti dhe Ismajli në qendër të mbrojtjes, Ramadani në rolin e shkatërruesit në mesfushë, i ndihmuar nga Asllani dhe Bajrami.
Kombëtarja shqiptare pritet të ketë një mbështetje të zjarrtë nga tifozeria, ndërsa biletat në Air Albania janë shitur 100%.
Qindra tifozë të dhjetëra grupimeve nga Kosova pritet të mbërrijnë në orët e pasdites në Tiranë për të mbështetur kombëtaren tonë në ndeshjen e sotme.
Në ndeshjen e sotshme pritet që gjysma e stadiumit të ndiqet nga tifozët e ardhur nga Kosova e Maqedonia e Veriut, në mbështetje të Kombëtares Shqiptare.
Discussion about this post