Vepra infrastrukturore e shumëpropaganduar e Unazës së Madhe në Tiranë nga qeveria, përveç shifrave stratosferike, ka sjellë zhgënjim edhe për cilësinë e punimeve dhe efikasitetin.
Dëshmia e fundit vjen nga pjesa e aksit për të cilin janë tenderuar mbi 20 milion euro nga Autoriteti Rrugor Shqiptar.
Një shatërvan që hedh ujë me presion në zonë është vepra e pakërkuar që është shfaqur këtë të martë, duke shqetësuar banorët dhe kalimtarët.
Firma fituese e tenderit në fjalë, që ka kryer edhe punimet në dukje të dobëta, është “Alb Star”.
Në media janë publikuar së fundmi edhe dëshmi të tjera të punimeve që lënë për të dëshiruar.
Një tjetër shqetësim për këtë vepër ka qenë edhe efiçenca. Situata në terren ka treguar se trafiku vijon të jetë i rënduar edhe pas hapjes së plotë të unazës.
View this post on Instagram
Nga opozita, vijojnë ta quajnë një megavjedhje.
“373 milion euro për 27 km dhe trafiku është më i rënduar se sa kur nuk kishim Unazë fare. Me të tilla ‘krim intelektuale’ që i shohin qytetarët çdo ditë por që veç SPAK-u nuk i sheh, një gjë është e sigurtë, që Belinda Balluku po nxiton t’i bëjë shoqëri harabelit pa pupla Erion Veliaj”, shkroi një ditë më parë në një postim në “FB” Tedi Blushi nga Partia e Lirisë, teka bashkangjitur postoi pamje të trafikut të rënduar në unazë, në zonën pranë Pallatit me Shigjeta.
Vepra është shoqëruar me kritika që në hapje të procedurave. Tenderat për të ashtuquajturën “rruga e florinjtë” nisën që në krye të herës me një skandal, ku një kompani arriti të shtinte në dorë kontratën për punimet në një prej lotëve, duke përdorur dokumente të falsifikuara. Për rastin, gjykata e Tiranës dënoi me disa muaj burg administratorin e kompanisë “DH Albania”, ndërsa pushoi hetimet për zyrtarët e Autoritetit Rrugor Shqiptar.
Kontrata u anulua, megjithatë procedurat e mëvonshme tenderuese të ARRSH-së (drejtuar nga Evis Berberi – tashmë pas hekurave për korrupsion dhe pastrim parash) që u ndanë në disa lote, ishin gjithashtu të dyshimta. Qindra miliona euro, sipas kritikëve, u dhanë në mënyrë korruptive te klientët e qeverisë.
Për rastin foli një ditë më parë edhe kreu i PD-së, Sali Berisha në prononcimin e dhënë në dalje të SPAK, duke vënë në qendër të akuzave Belinda Ballukun, ministren e Infrastrukturës, njëkohësisht zëvendëskryeministre. “Lubia – siç e quajti ai – është e pashembullt në Ballkan dhe Europë, ndau 13 kilometra rrugë në 14 kontrata”.
Discussion about this post