Shkodra nuk gjen qetësi nga atentatet dhe mesazhet me tritol të krimit. Një i tillë ka ndodhur mëngjesin e kësaj të hënë, ku një sasi tritoli ka shpërthyer në zonën e Fermentimit në Shkodër.
“Ora News” ka siguruar pamjet e vendosjes së lëndës plasëse në lokalin e 65-vjeçarit në Shkodër, ku shihet qartë që lënda plasëse është vendosur rreth orës 01:38 minuta të ditës së sotme.
Lënda plasëse, mësohet se i është vendosur lokalit në pronësi të shtetasit F.K, rreth 65 vjeç. Nga shpërthimi fatmirësisht nuk ka persona të lënduar, por vetëm dëme materiale, ndërkaq policia ka mbërritur në vendngjarje dhe ka nisur hetimet.
Në reagimin e parë të saj, Policia e Shkodrës deklaroi se shpërthimi ka ardhur nga një lënde plasëse amonit malor, i prodhuar në mënyrë artizanale.
“Rreth orës 05:50 të mëngjesit të sotëm, shtetasi F. K., 65 vjeç, banues në lagjen “Skënderbeg”, Shkodër, ka njoftuar se kur ka shkuar për të hapur biznesin e tij (bar-kafe), ka konstatuar të thyer xhamin e derës të këtij biznesi.
Nga veprimet paraprake të kryera nga grupi hetimor, dyshohet se para derës së këtij lokali, është hedhur një sasi e vogël lënde plasëse (amonit malor i prodhuar në mënyrë artizanale).
Grupi hetimor, në bashkëpunim me Prokurorinë, vijon punën në vendngjarje me qëllim zbardhjen e rrethanave të kësaj ngjarje, si dhe për identifikimin e kapjen e autorit/ëve”, njoftoi policia e Shkodrës.
Discussion about this post