Astrit Avdylaj u arrestua nga Policia në Shijak këtë të shtunë, disa javë pasi u shpall në kërkim nga Prokuroria e Posaçme. 50-vjeçari, i konsideruar si drejtues i një grupi kriminal në këtë zonë, është vënë në pranga në banesën e tij dhe gjatë ndalimit i është sekuestruar edhe një armë zjarri tip pistoletë.
Për arrestimin e Avdylajt, u angazhuan në terren edhe forcat speciale të RENEA-s. Ai u shpall në kërkim me kërkesë të SPAK, që ka ngritur dyshime se është i përfshirë në sigurim të kushteve për vrasjen e Durim Bamit.
Komunikimet në aplikacionin “Sky” treguan se si Astrit Avdylaj mbante komunikime me ish-deputetin Arben Ndoka dhe ofrohet ta ndihmojë atë në planin për eleminimin fizik të Durim Bamit. Avdylaj i dërgon nipin e tij Aldo Avdylajn dhe Arben Mërkurin, Ndokës për të realizuar qëllimin.
Nga ana tjetër, Astrit Avdylaj gjithashtu akuzohet se ka organizuar në bashkëpunim me persona të tjerë, futjen në Shqipëri në mënyrë ilegale të nipit të tij nga Mali i Zi në mënyrë që të realizonte vrasjen dhe të kishte më pas alibi. Astrit Avdylaj është përballur edhe më herët me drejtësinë për akuza të trafikut të lëndëve narkotike dhe krime kundër jetës.
Pamjet e aksionit të ndalimit të Avdylaj u publikuan nga policia.
Discussion about this post