Fjala ”mik” nuk ka të njëjtin kuptim për kryeministrin Edi Rama, në shtator të vitit 2022 dhe në janar të këtij viti. Termi me të cilin përshkroi marrëdhënien që kishte me ish-agjentin e FBI-së Charles McGonigal, të vënë nën akuzë për korrupsion, sot për kreu e qeverisë Edi Rama, kishte tjetër kuptim. Përpara gazetarëve, Rama tha se kishte përdorur fjalën ‘mik’ në gjuhën angleze në shtator, që nuk ka të njëjtin kuptim si në shqip sipas tij.
Fjala e Ramës
“Fjala mik është shumë e madhe. Unë kam përdorur gjuhën angleze për natyrën e marrëdhënies, ‘friendly relation’, marrëdhëie miqësore. Por jo mik që unë kam ndarë jetën me të. Unë e kam takuar në zyrën e FBI-së, më ka prezantuar me kolegë, më ka dhënë dhe dhurata, kapele e ç’janë këto që në Big Brotherin politik u shfaqën si pajisje përgjimi. Ka ardhur dhe në Shqipëri. Jemi takuar, s’ka pasur asnjëherë ndonjë…interesi im ka qenë që të shkëmbej biseda e opinione lidhur me fushat ku ai ishte i nivelit të lartë, për korrupsionin,”- tha kryeministri.
Rama ‘harron’
Por, ‘harron’ që deklaratat raportohen, ruhen dhe arkivohen për tu përdorur kur është nevoja, në një ditë si sot, kur kryeministri Rama ‘ha’ fjalët e veta. Në videon e mëposhtme, shihet qartë që kryesocialisti nuk ka folur anglish, por shqip.
Shefi i Kundërterrorit të FBI
“Shefi i Kundërterrorit i FBI-së ka qenë dhe është miku im nuk diskutohet. Nëse ai ka një çështje të tijën me drejtësinë në SHBA kjo është çështje e tij me drejtësinë atje. lëreni të flasë drejtësia në SHBA. Nuk bëhet drejtësia e nuk nxirren fajtorët e nuk bëhen akuzat në këtë farë feje se është e tmerrshme. Dhe nuk është e tmerrshme për mua sepse nuk kam asnjë problem dhe për sa kohë vijoj në këtë detyrë i kam marrë parasysh dhe pres më shumë se kaq, i pres të gjitha. Por është e tmerrshme për këtë popull për këtë vend, për gjithë ato që ne i konsiderojmë vlera shqiptare e parime e tradita. Çfarë të them më shumë se kaq. Bëhet fjalë për një çështje në SHBA që s’ka asnjë lidhje me mua, me qeverinë shqiptare, biznes të çfarëdollojshëm, me këtë teori i bie që ne nuk duhet të takojmë askënd sepse nesër dikush mund të ketë një problem me drejtësinë në vendin tij. Kjo është çmenduri”, deklaronte Rama, në shtator të vitit 2022. /Dosja.al/
Discussion about this post