Në 16 qershor u publikua një sekuencë 2-3 minutëshe nga një video skandal që ishte realizuar në 6 qershor 2023, ku shfaqej ish-kryebashkiaku i Kukësit, Safet Gjici, në atë kohë në detyrë, duke kryer marrëdhënie intime me një grua.
Pamjet u realizuan nga një kamer që e posejdonte gruaja që shfaqet, e identifikuar më pas si Alma. K, ndërsa SPAK ka nisur hetimet ndaj ish-kryebashkiakut të Kukësit, i cili u dorëhoq, pak orë pas publikimit të videos në rrjet.
Hetimet e SPAK, sipas raportimeve, janë përqëndruar në dy pista: “shpërdorim detyre” dhe “korrupsion pasiv i funksionarit publik”.
SPAK i ka ndaluar daljen jashtë vendit Alma. K, e cila pak ditë më parë tha se nuk i ishte ofruar asnjë mbrojtje. Por sipas raportimeve, SPAK mund ti ofrojë 40-vjeçares statusin e dëshmitarit, duke i ofruar kështu edhe mbrojtjen, edhe pse zyrtarisht kjo nuk pohohet nga Prokuroria Speciale.
Mësohet se Alma. K është marrë në pyetje nga hetuesit, i është marrë dëshmia, sikundër i është sekuestruar edhe aparati cellular, për të verifikuar kontaktet apo bisedat që kjo shtetase mund të ketë pasur me persona të tretë, lidhur me çështjen në fjalë.
Paralelisht, agjentët e BKH kanë mbledhur pamjet filmike në Bashkinë e Durrësit, sikundër kanë marrë dëshmi nga punonjës të administratës në këtë institucion.
Në pyetje rezulton të jetë marrë dhe nën/kryetari i bashkisë Kukës, Granit Gjana, i cili është personazhi i tretë i video-skandalit, dhe personi që merr kontakt me Alma K., duke administruar dokumentacionin e plan-projektit për sterilizimin e qenve të rrugës. Projekti në fjalë ka mbetur në letër, pasi duhej një miratim nga Këshilli Bashkiak.
Në pyetje pritet të merret edhe një nga këshilltarët socialistë të Këshillit Bashkiak të Kukësit, i cili sipas raportimeve 3 ditë pas regjistrimit të videos, ka pasur një debat me ish-kryebashkiakun, debat që kaloi në një përplasje verbale dhe madje kërcënime për publikimin e materialeve komprometuese. E gjithë skena mes këshilltarit dhe kryebashkiakut në atë kohë është zhvilluar para anëtarëve të tjerë të Këshillit Bashkiak.
Nuk dihet se sa kohë mund ti duhen SPAK për të përmbledhur gjithçka në dosje dhe nëse do të konkludojë për të ngritur akuzë penale ndaj ish-Kryebashkiakut, por ajo që dihet është se video-skandali i dogji mandatin e dytë si kryebashkiak, një prej njerëzve më të besuar të Kryeministrit Edi Rama në veriun e vendit.
Discussion about this post