Serbia në basketboll për meshkuj është eliminuar në mënyrë të papritur që në fazën 1/16 të Europianit të Basketbollit ku ishte favorite kryesore për trofeun, në një nga surprizat më të mëdha të viteve të fundit në arenën ndërkombëtare. Skuadra e cila ka në radhët e saj disa yje të NBA, me në krye Nikola Jokiç, ka dalë nga turneu pasi është eliminuar nga Finlanda.
Serbët ishin në avantazh 77-75 në periodën e katërt, por Elias Valtonen me 8 pikë të shënuara në dy minuta e fundit të ndeshjes bëri diferencën për fitoren 92-86, në duelin ku në fushë për Finlandën ishte edhe basketbollisti me origjinë nga Mitrovica, Edon Maxhuni.
Jokiç pritej të ishte ylli i turneut, ashtu siç ka qenë shpeshherë në NBA në vitet e fundit dhe mbrëmë ishte mbresëlënës me 33 pikë. Një trepikësh i tij kur mbeteshin 16 sekonda bëri që distanca e Serbisë të ngushtohej në 5 pikë, por nuk mund të bënte më shumë ndaj një loje ekipore të shkëlqyer të finlandezëve.
“E papranueshme”, ishin fjalët e tij pas ndeshjes, kur iu kujtua se Finlanda kishte fituar topin në tabelë në sulm 20 herë gjatë ndeshjes. Kjo ishte fitorja e parë e Finlandës ndaj Serbisë që nga viti 2009.
Discussion about this post