Radhë kilometrike janë rregjistruar këtë të hënë në pikën e kalimit kufitar të Kapshticës.
Në palën shqiptare po punohet me kapacitete të plota, me 3 sportele në dalje, por duket se situata është bërë problematike nga pala greke për shkak se këta të fundit kanë fluks në hyrje e në dalje dhe nuk kanë shtuar sportele të tjera.
Emigrantët shqiptarë kanë treguar se kjo situatë nuk është aspak normale, ndërsa kanë pranuar faktin se po presin prej 2 orësh për të kaluar kufirin dhe do të duhet të presin edhe më tepër derisa të kalojnë edhe palën greke. Pas festimit të Pashkës në vendlindje, emigrantët shqiptarë thonë se kjo situatë i ka indinjuar dhe është një problematikë që ndodh çdo vit, ndërsa presin që të merren masa sidomos për familjet që kanë edhe fëmijë të vegjël në mjet.
“Kemi 2 orë që presim. Nuk na kanë thënë asgjë, presim, nuk na kanë thënë asnjë lajm asgjë. Festuam Pashkën dhe po kthehemi në Selanik. Kështu bëhet gjithmonë për festa, ska dalë ndonjë zgjidhje.”
“Kemi rreth një ore e gjysmë , dy orë që presim . S’ na kanë thënë, asnjeri asnjë përgjigje s’ kemi marrë. Ishim në Shqipëri për Pashkë, qëndruam 1 javë. Ata që janë me femijë të vegjël e kanë problem edhe për shkak të temperaturave, ne hajde se presim. Është problem edhe kjo. Ata që janë me foshnja të vogla? Problem i madh.”
“Kemi 2 orë, kjo pritje kështu ctë them, është katastrofë. Ndodh gjithmonë kështu, nuk ështe hera e parë. Ishim për Pashkën , qëndruam 1 javë, festuam Pashkën por na doli nëpër hundë.”
“Po presim një orë e gjysëm . Kemi ardhur nga Elbasani, ishim për Pashkën, i festuam për bukuri edhe tani do shkojmë për punët tona. Normale më duket se kemi 30 vite që bëjmë këtë rrugë e është e zakonshme , jemi mësuar me këto gjëra. Shteti ato që nuk i ka berë deri tani, duhet ti bëjë nga 11 Maj e tutje.”
“Kemi gati 2 orë. Nuk është normale, ne ditë festash kështu ndodh gjithmonë , nuk është hera e parë. Ne ishim në Shqipëri për të festuar Pashkën. Qëndruam 3 ditë. Shtetit do i bëj një apel, të rregullojë sistemin të menaxhimit të verifikimit të pasaportave sepse vazhdojnë akoma me tastierë, nuk e kanë auromatike siç verifikohen në doganën greke.”
“Kam 2 orë që pres. Ne jemi mësuar. Ndodh çdo Pashkë, por me çfarë kuptova unë nuk ka faj pala shqiptare , vjen nga greku. Ato ferkimet e tyre i dinë ata. Asgjë, kush ka fuqi e bën vetë, shteti është një spektator, asgjë më shumë. Këtu e kemi vendin, na merr malli, për Pashkën kemi edhe lejë dhe gjejmë rastin edhe vemë. Shqipëria është vendi jonë. Urojmë që Shqipëria të bëhet sa më mirë.”
“Duhet të veprojë shteti. Nuk merret vesh ç’po bëhet, duhet të ikim sa më shpejt. Do presim e 2- 3 orë të tjera e na ikin 4- 5 orë gjithsej duke pritur.”
Qindra mjete vazhdojnë të presin në radhë për të kaluar kufirin, ndërsa radha ka arritur deri në disa kilometra. Situata e rënduar pritet të vijojë deri në orën 21:00 pasi edhe pala greke ka fluks të shtuar në dalje të saj.
Discussion about this post