Ditën e nesërme pritet që presidenti i Turqisë, Rexhep Taip Erdogan, të vizitojë qytetin e Laçit, për të parë nga afër ndërtimin e banesave në zonën e dëmtuar nga tërmeti. Erdogan pritet të mbërrijë në aeroportin e Rinasit në orën 09:00, ndërsa në orën 14:00 do të takohet me kryeministrin Edi Rama në kryeministri, ku pritet të firmosin shtatë marrëveshje bashkëpunimi mes dy vendeve. Gjithashtu Erdogan do të vizitojë edhe xhaminë Ethem Beu, në Tiranë për të parë rinkonstruksionin e këtij kulti fetar.
Lidhur me këtë vizitë të Erdogan në Shqipëri, analistja Anisa Bahiti shprehet se mes Shqipërisë dhe Turqisë ka një ngecje të marrëdhënieve, kjo për shkak të lëvizjes Gylen në Shqipëri dhe linjës politike që vendi ynë ka zgjedhur.
“Marrëdhëniet Turqi-Shqipëri i shoh të ngecura për shkak të prezencës së Lëvizjes Gylen në Shqipëri. Dëshmi e qartë është mospërfundimi dhe mosdorëzimi i xhamisë së madhe të Tiranës, për shkak se Tirana zyrtare nën presionin amerikan dhe europian nuk arriti të vendoste në krye të Komunitetit Musliman të Shqipërisë, një jo anëtar të Lëvizjes Gylen, të cilën Turqia e konsideron terroriste. Gjithashtu Turqia ka konsideruar jo serioz qëndrimin e Shqipërisë në NATO përsa i përket lëvizjeve kurde në veri të Sirisë dhe Irakut si dhe pajisjen me shtetësi shqiptare të anëtarëve të lëvizjes të Gylenit”, shprehet analistja.
Anisa Bahiti thekson se presidenti Erdogan do shihte në favorin e tij mbajtjen e pushtetit nga Edi Rama, kjo për shkak të lobimit të këtij të fundit në ne zgjedhjen e kreut të ri të NATO-s.
“Në këtë vend kaq të rëndësishëm, Erdogan do të pëlqente të shihte Ramën, kryeministrin e Shqipërisë. Ky i fundit mund të ketë mbështetjen e Hungarisë se Orbanit, të Çekisë, të Polonisë, të vendeve të Ballkanit, të Italisë falë një lobingu të fuqishëm të mikut të tij D’ Alema ish-Kryeministër, por edhe të Presidentit të Francës, e madje edhe të SHBA falë marrëdhënieve të shkëlqyera qe ai ka me sistemin Soros dhe administratën aktuale në Uashington”.
Erdogan pritet qe ta mbyllë vizitën e tij me një fjalë në parlamentin e Shqipërisë.
Discussion about this post