Mbledhja e sotme e Komisionit të Shëndetësisë është shoqëruar me debate të ashpra midis përfaqësuesve të mazhorancës dhe opozitës.
Kryetarja e Komisionit, Albana Vokshi ka hedhur akuzat se 70 prej patronazhistëve, janë të punësuar në ministrinë e Shëndetësisë. Ndërsa për këtë nuk ka mbetur pa reaguar edhe nënkryetarja Klodiana Spahiu e cila e konsideroi si një mënyrë jo të duhur për të drejtuar mbledhjen e Komisionit.
Pjesë nga debati në Komisionin e Shëndetësisë:
Albana Vokshi: 70 patronazhistë nënpunës të Ministrisë së Shëndetësisë. U përdorën për fushatë. Klodi fike. Fike mikrofonin. Do i themi emër më emër, patronazhistët. 50 mijë patronazhistë. Këta duhet të gjykohen. Jeni mazhorancë ilegjitime. Ministrja duhet të ishte dorëhequr. Është përgjegjësja kryesore që kemi gjithë këto vdekje. Patronazhimi, kush shkonte çonte kura dhe tampone në orën 2 të natës.
Klodiana Spahiu: Është mënyra më e shëmtuar të drejtoni komisionet.
Albana Vokshi: E di, e di Klodi që e vërteta ju dhemb.
Klodiana Spahiu: Po ju tërheq vëmendjen. Të kthehemi në normalitet. Nuk mund ta ktheni në një arenë politike për ju. Kjo të jetë hera e fundit. Kjo që bëni ju nuk ndodh në asnjë komision.
Albana Vokshi: Nuk ta dhashë fjalën. Mbylle mikrofonin. Nuk do lejoj që këtu të bëhet propagandë. O Klodi mos bëj zhurmuesen këtu.
Gjatë fjalës së saj, deputetja e PD, Grida Duma tha se shëndetësia është një nga sektorët më jetikë në vend, ndërsa kritikoi ministren duke thënë se flet vetëm për suksese. Duma u ndal edhe tek procesi i vaksinimit, ku kritikoi ministrinë për vaksinimin me detyrim të studentëve.
“Me pathos politik duhet t’i përballojmë të vërtetat. Është një sektor që e ka për nga efektet e ka shteruar vendin si nga burimet humane edhe në logjika. Nuk është politikë, është realiteti jonë. Është sektor shumë jetik. Nuk ka sens që ne të mos pranojmë këto të vërteta. Vjen ministrja, ekzekutivi dhe flasin për suksese. Që nga momenti që nuk vetëdeklarohet që kemi këto probleme ne kuptojmë që nuk po flasim për të vërtetën. Dhe ju i thoni që opozita s’duhet të flasë. Në këtë sektor ne nuk mund të jemi palë. Ka shumë rëndësi si vendosemi përballë qytetarëve. Padyshim që hyn politika këtu. Kemi një skandal politik, ne themi vaksinim sot. Disa godina janë bërë por shëndetësia është shërbim. Kjo është çështja. Kjo nuk mundet sot po i kemi këto suksese kur statistikat tregojnë që shqiptarët kanë harxhuar 40 mijë lekë të vjetra për tu trajtuar nga Covid. Pyetja që kam është si është menduar kronologjia e vaksinimit? Studentët nuk duan të vaksinohen. A do jetë një vaksinim me vaksina vetëm të certifikuara nga Ema?” tha Duma.
Ministrja e Shëndetësisë Ogerta Manastirliu, në seancën dëgjimore në Komisionin për Shëndetësinë tha se në bazë të marrëveshjes së re me kompaninë Pfizer pritet që brenda këtij viti të vijnë 500,760 doza Pfizer, që do të shërbejnë për të rritur mbulesën vaksinale.
