Paraditen e së shtunës, Marsela Pushani, 40 vjeç, goditi me thikë, motrën e saj Amanda, 37-vjeçare, duke i shkaktuar vdekjen. Ngjarja fillimisht u trajtua si një vdekje natyrale, më pas si një vetëvrasje, ndërsa pas autopsisë, Policia arrestoi Marsela Pushanin si autore të dyshuar të vrasjes së motrës së saj.
Marsela ka pranuar krimin, por ka thënë se nuk donte të vriste të motrën, e cila sipas raportimeve kishte probleme me alkoolin dhe pikërisht për këtë shkak kishin nisur edhe debatet e sherret në familje. Motrat Pushani banonin në të njëjtën banesë me nënën e tyre të moshuar, ndërsa babai i tyre kishte humbur jetën po nga alkooli.
Në emisionin “Me zemër të hapur” është trajtuar pikërisht kjo ngjarje, ndërsa ka dhënë dëshminë një fqinj i familjes Pushani, që pothuajse ka dhënë të njëjtin version mbi viktimën, ashtu si edhe familjarët e saj, se kishte probleme me alkoolin.
Fqinji i tyre në një prononcim për emisionin “Me zemër të hapur” tha se viktima merrte borxhe. Pronari i dyqanit, në lagjen ku jetonin dy motrat, tha se 37-vjeçarja i kërkonte alkool dhe kur nuk i dha ajo nuk i foli më.
“Ne na lajmëroi një komshi për atë që kishte ndodhur, ka kaluar kohë që kur ajo vinte me kërkonte që t’i jepja alkool. Po që kur i thash asaj se nuk i jap më pije, as motra e saj nuk më foli më. Babain e tyre e njihja ishte një burrë zotëri nuk konsumonte alkool, ishte shumë normal. Mesa di unë ka vdekur nga problemet e zemrës. Ato jetojnë këtu që kur është ndërtuar ky pallati, nuk kanë vëlla, janë të pa martuara. Ajo merrte borxh me ditë. Nuk e di nëse punonte mbaj mend që dilte në mëngjes për punë para disa kohësh”, tha fqinji në emisionin “Me zemër të Hapur” të moderatores Evis Ahmeti.
Fillimisht familja raportoi për një vdekje natyrale të 37-vjeçares Armanda Pushani, por më pas u zbulua se viktima kishte plagë të shkaktuara me thikë.
Krimi dyshohet se ndodhi për shkak se viktima ishte e alkoolizuar dhe agresive në familje. Dy vajzat jetonin me nënën e tyre në një banesë në rrugën “Hajdar Hidri” në kryeqytet.
40-vjeçarja pretendon se motra kishte marrë thikën dhe e kishte kërcënuar se do ta vriste atë dhe mamanë, për këtë arsye e ka qëlluar me thikë në kushtet e vetëmbrojtjes.
Discussion about this post