Gjykata e të miturve në Venecia vendosi arrest me burg për 17-vjeçarin e arrestuar pak ditë më parë, si i dyshuar për vrasjen e shqiptarit Bledar Dedja në Itali.
Sipas raportimeve, i dyshuari u mor në pyetje për rreth tre orë, për të hedhur më shumë dritë mbi ngjarjen. Adoleshenti, një italian nga një familje e shkëlqyer me banim në komunën e Pieve del Grappa, e pranoi krimin por ka ende shumë pika të paqarta në lidhje me motivin.
I hetuar për vrasje me paramendim, pas përballjes me hetuesit, 17-vjeçari do të merret sërisht në pyetje me kërkesë të mbrojtjes nga prokurori publik Giovanni Parolin në ditët në vijim.
Nga raportimet e fundit, mësohet se 17-vjeçari ka pasur një takim me viktimën ditën e vrasjes. Pasditen e së shtunës të 20 janarit djali u identifikua nga disa kamera në sheshin në Paderno del Grappa, ku me sa duket ndodhej me Bledarin. Më pas të dy largohen së bashku me Mercedesin B-Class të 39-vjeçarit duke u nisur drejt një zonë e izoluar, e njohur si një pikë takimi për çiftet.
Pas vrasjes së kryer me 20 goditje me thikë, ai ka hequr qafe armën dhe çelësat e makinës së shqiptarit. Ai u gjet i mbyllur brenda automjetit dhe me veshje që ishin lyer me gjak.
Gjatë sulmit 17-vjeçari pësoi një plagë me thikë në dorë, një prerje të thellë midis gishtit të madh dhe gishtit tregues. Pasi u nis në këmbë nga Via Dei Carpini, ai u filmua nga një kamera teksa i kërkonte autostop një kalimtari vendas (të cilit iu sekuestrua edhe makina për hetim), i cili e shoqëroi deri në stacionin e autobusit. Në këtë pikë gjurmët e tij humbasin derisa ai rishfaqet në një dhomë të urgjencës lokale për të trajtuar dorën e tij.
Detaji i autostopit dhe ndihma e parë në spital ishin elementët e parë që i çuan hetuesit në gjurmët e tij. Por prova përfundimtare dhe vendimtare doli vetëm kur iu zhbllokua celulari i dytë i Bledarit, ai që dyshohet se kishte përdorur për të organizuar “jetën e dytë” pa dijeninë e familjes, të përbërë nga kontakte dhe takime të fshehta seksuale me persona të tjerë.
Madje, në mesazhe janë gjetur gjurmë të qarta kontaktesh mes 17-vjeçarit dhe Dedja-s, duke përfshirë me sa duket mesazhin me të cilin ishte caktuar takimi përfundimtar.
“Po, isha unë”, pranoi 17-vjeçari, por nuk tha asgjë për motivin. .
Djali kishte rreth një vit lidhje me Bledar Dedja, të cilin e takoi gjatë një periudhe ndërrimi shkollë-punë në vendin ku punonte 39-vjeçari. Hipoteza është se i riu kishte përfunduar në një rrjet prostitucioni – mes të cilëve edhe të mitur, siç konfirmohet ndër të tjera nga elementët që policia gjeti nga analiza e celularit të viktimës dhe të cilët tashmë janë duke u ekzaminuar nga hetuesit.
Mediat italiane aludojnë se adoleshenti ndoshta donte të dilte nga ajo rrugë dhe Bledari mund ta kishte shantazhuar, duke e kërcënuar se do t’i tregonte gjithçka familjes së tij. Dhe për këtë arsye 17-vjeçari organizoi takimin e fundit dhe vrau shqiptarin.
Discussion about this post