Ngjarja e rëndë që shokoi opinion publik pas vrasjes dhe groposjes të 8-vjeçarit Mateo Vasiu në Fier mbetet ende e pazbardhur ka grupi hetimor. Burime bëjnë me dije se Klodian Çalamani është i qetë në burg dhe të gjitha tentativat për rimarrjen në pyetje kanë dështuar. Çalamani nuk rrëfen asgjë për ngjarjen dhe arsyet që e bënë të kryejnë krimin e rëndë apo faktin nëse ka bashkëpunëtorë siç pretendojnë familjarët.
Qetësia e ka karakterizuar Çalamanin gjatë gjithë kësaj ngjarje të rëndë. Ai ka ditur të ruajë qetësinë edhe përpara se familjarët të zbulonin krimin duke u bashkuar me ta për të kërkuar Mateon dhe duke i pyetur herë pas here nëse “e gjetën”. Pikërisht kjo qetësi e shoqëron edhe në burg, ku nuk ka pranuar të tregojë asgjë për ngjarjen. Ky njeri, i cili shëtiste rrugëve të fshatit me hanxhar duke terrorizuar të gjithë banorët e fshatit, i dënuar me 4 vite burg pasi dhunoi një të mitur, u la i lirë nga organet e drejtësisë.
Shtëpia e Klodian Çalamanit, vendi ku u krye krimi tërheq vëmendjen e të gjithë banorëve të fshatit dhe medias, ndërsa familjarët e Mateos kthehen të dëshpëruar në vendin ku mori frymë për herë të fundit i vogli i tyre për të kërkuar një provë, një provë të vetme që zbardh të vërtetën e ngjarjes makabër.
Krimi i rëndë ka thyer zemrën e familjarëve të cilët kërkojnë drejtësi dhe apelojnë që autori të varet në litar. Mbledhja e firmave për peticionin e iniciuar prej tyre ku kërkojnë dënim me vdekja për Klodian Çalamanin ishte një fije shpresë ku familjarët u kapën për të mos prekur fundin pasi varrosën të birin. Ndërsa sot, ata janë mbyllur në shtëpinë e tyre, në kërkim të një momenti paqeje dhe kush do që iu troket në derë thonë vetëm dy fjalë: “Boll më”.
Krimi makabër ndodhi në Grecalli të Fierit në 16 nëntor, ku Klodian Çalamani, dhunoi, vrau me sëpatë dhe varrosi 8-vjeçarin Mateo Vasiu.
Discussion about this post