Femi Sufaj, zv.Drejtor i Përgjithshëm i Burgjeve, dha mbrëmjen e sotme detaje lidhur me situatën në burgun e Peqinit, atje ku të premten e javës së kaluar, u ekzekutua me armë zjarri i dënuari Arben Lleshi, ndërsa autor i krimit ishte Sokol Mjacaj, i dënuar me burgim të përjetshëm.
Në studion e “Opinion” Sufaj u shpreh se lidhur me faktin e mosfunksionimit të skanerit është e vërtetë një gjë e tillë, por ai shtoi se skaneri është vetëm një nga elementët e kontrollit të sigurisë.
“Sa i përket skanerit është e vërtetë që s’ka punuar. E dini sa mjete kontrolli ka për të hyrë në burg? Ka porta metalkërkuese, ka dy për të futur në burg, metalkërkues dore. Ka mjete specifike dhe nuk janë prishur të gjitha njëherësh. Ka një kompleks pajisjesh nuk është vetëm skaneri. Edhe nëse prishet skaneri ka mjete të tjera, gjithsesi ai është mjet i sigurisë është riparuar ka procedura që duhen kuptuar”, tha ai.
Sufaj u shpreh se në burgun e Peqinit nga punonjësit më para ka pasur një prishje të ekuilibrit mes dy elementeve, të asaj të sigurisë dhe respektimit të të drejtave të të burgosurve.
“Sa i përket informacionit, drejtoria kishte marrë informacion për një prishje të ekuilibrit mes dy elementeve: sigurisë dhe respektimit të të drejtave. Ky lloj ekulibri është shumë i vështirë për tu mbajtur sepse nëse ne shtrëngojmë shumë problemin e sigurisë mund të kalojmë në cënim të të drejtave. Stafi atje i mëparshëm e ka prishur këtë ekuilibër midis sigurisë dhe të drejtave duke toleruar futjen e disa sendeve nuk po them për sendet e ndaluara. Frigoriferi është i lejuar, televizori lejohet. Stafi është vënë para përgjëgjësisë. Drejtoria e Përgjithshme e Burgjeve kanë bërë procedime për disa të burgosur dhe disa ish-drejtues për këtë prishje të ekuilibrit”, u shpreh zv.Drejtori.
Lidhur me mënyrën se si mund të jetë future arma në ambjentet e burgut Sufaj nuk ka preferuar të jap një mendim duke ja lënë në dorë organeve hetimore që të japin një konkluzion.
“Sa i përket armës këtu ka një dinamikë. Unë nuk preferoj të flas për këtë gjë sepse është një çështje nën hetim edhe vetëm organet hetimore do të japin një konkluzion të saktë sepse ju po thoni edhe media se mund të ketë hyrë si mjet hakmarrje me pagesë.
Mjetet, armët e zjarrit zakonisht futen për qëllime arratisje. Unë vetë nuk e përjashtoj këtë motiv se mund të ishte një plan tjetër, por fakti që është shënjestruar ky person kur nuk ishte identifikuar një konflikt mes personave të bën të mendosh se kjo mund të jetë një vrasje me pagesë”, tha ai.
Discussion about this post