Gjykata e Lartë ka lënë në fuqi vendimin e Apelit të Gjykatës së Posaçme kundër Korrupsionit dhe Krimit të Organizuar (GJKKO) për Xhulian Hoxhën dhe Euglen Halilin, të cilët akuzohen për vrasjen e Emiljano Ramazanit dhe Regis Rugajt në Elbasan në vitin 2020.
Apeli i GJKKO vendosi më 8 prill 2024 dënimin me burgim të përjetshëm për Xhulian Hoxhën, ndërsa Euglen Halili u dënua me 16 vite burg dhe gëzon statusin e bashkëpunëtorit të drejtësisë.
Vendimi i Apelit të Posaçëm erdhi pas ankimimit nga SPAK i dënimeve të dhëna në Shkallën e Parë. Prokuroria kërkoi 30 vite burg për Hoxhën dhe 12 vite për Halilin, për lidhje me kryerjen e dy vrasjeve, që dyshohet se janë sponsorizuar nga Erjon Alibej.
Ngjarjet e rënda ndodhën në qytetin e Elbasanit, ku më 20 korrik 2020 u vra Emiljano Ramazani, i njohur si ‘Rramani’, i cili dyshohet se ishte shpërndarës i kokainës në qytet dhe që vrasja e tij kishte motive larje hesapesh për drogën. Pak ditë më vonë, më 29 korrik, u gjet i vrarë me thikë miku i tij i ngushtë, Regis Runaj, 23 vjeç, trupin e të cilit e hodhën pranë varrezave të qytetit.
Ky rast është ndër ngjarjet më të rëndësishme të krimit të organizuar në Elbasan dhe mbetet shembull i përpjekjeve të drejtësisë për të goditur krimin e rëndë në vend.
Discussion about this post