Aleksandër Vuçiç ka reaguar në lidhje me vendimin e KFOR-it se nuk do të lejojë ngritje të barrikadave në veri të Kosovës. I irrituar nga ky vendim, presidenti serb paralajmëroi se dy apo tre ditët e ardhshme do t’i dërgojë një letër misionit të NATO-s në Kosovë, dhe këtë herë do të bëhen disa pika të qarta.
“Qëllimi juaj duhet të jetë mbrojtja e popullatës serbe, ata janë minoritet. Pse po i ndihmoni shqiptarët që të shtypin këtë minoritet. Pse, së bashku me shqiptarët po keqtrajtoni serbët, a është detyra juaj apo jo që të ndihmoni serbët”, tha Vuçic në Beograd, gjatë një mbledhjeje me partinë e tij.
Dy ditë më parë, komandanti i KFOR-it, gjeneralmajor Ferenc Kajari, tha për televizionin publik të Kosovës se situata në veri të vendit është e qetë dhe se forcat ndërkombëtare nuk do të lejojnë më vendosjen e barrikadave. Misioni madje e ka bërë të qartë gatishmërinë e tij për të ndërhyrë në rast se rrezikohet stabiliteti në Kosovë.
Vuçic thotë se letrën do ta nisë pasi të zhvillojë bisedime me të dërguarin e posaçëm të Shteteve të Bashkuara për Ballkanin Perëndimor, Gabriel Escobar, dhe të dërguarin e posaçëm të BE-së për dialogun, Mirosllav Lajçak.
Presidenti serb shtoi se ai e interpreton ndryshe rolin e KFOR-it dhe NATO-s. Sipas tij, kriza nuk mund të të zgjidhet në këtë mënyrë, por vetëm përmes bisedimeve politike. Vuçiç, po ashtu falënderoi ambasadorin e SHBA-së në Serbi, Christopher Hill, për deklaratat e bëra një ditë më parë, kur diplomati amerikan tha se në raundin e fundit të dialogut në Bruksel, Serbia kishte shkuar e përgatitur, ndërsa palët e tjera jo.
Discussion about this post