Presidenti i Serbisë, Aleksandar Vuçiç, ka deklaruar se nuk e di se cila është zgjidhja për shtensionimin e situatës me Kosovën dhe se është në pritje që të dëgjojë propozimet e zyrtarëve perëndimor.
“Vetëm të hënën kur të dëgjoj Lajçakun dhe Escobarin, atëherë do t’i thërras serbët nga Kosova për t’u konsultuar. Unë nuk e di se çfarë ka menduar dikush si rrugëdalje”, ka theksuar Vuçiç për mediat në Beograd.
Në fakt, i dërguari i posaçëm i BE-së për dialogun Kosovë-Serbi, Miroslav Lajçak dhe i dërguari amerikan për Ballkanin Perëndimor, Gabriel Escobar, javën e ardhshme do të qëndrojnë në Prishtinë dhe në Beograd.
Vizita e tyre vjen pas tensioneve në veri të vendit, ku strukturat kriminale kanë shfaqur dhunë ndaj Policisë së Kosovës, KFOR-it dhe mediave, derisa në Leposaviq, Zubin Potok dhe Zveçan tash e disa ditë serbët e kësaj pjese po protestojnë kundër kryetarëve shqiptarë të këtyre komunave.
Serbët, në prill, i kanë bojkotuar zgjedhjet e jashtëzakonshme në katër komunat veriore me direktivat e Beogradit zyrtar dhe rezultatet e këtyre zgjedhjeve nuk i kanë pranuar.
Ndërkohë, dje, presidenti francez, Emanuel Macron dhe kancelari gjerman Olaf Scholz, të cilët i ulën në të njëjtën tavolinë presidenten Vjosa Osmani dhe presidentin serb, Aleksandar Vuçiç, kërkuan shpalljen e zgjedhjeve të reja në katër komunat në veri të Kosovës që banohen me shumicë serbe dhe garantimin për pjesëmarrjen e serbëve në këto zgjedhje. Duket se me këtë propozim tashmë janë pajtuar liderët e Kosovës, por ende jo edhe presidenti serb, i cili ende nuk e di nëse serbët e Kosovës duhet të marrin pjesë në ato zgjedhje.
“Duhet të bisedoj me ta këto ditë dhe të shoh se çfarë do të fitojë populli ynë, e jo vetëm çfarë do të lëshojë pe. Gjithmonë jemi të gatshëm dhe duam paqe e ulje të tensioneve”, tha Vuçiç duke shtuar se nuk është optimist.
Ai në fund tha se kryeministri i Kosovës, Albin Kurti dëshiron që Serbia të hyjë në konflikt me NATO-n, por siç tha “për ne assesi nuk është në interes që të luftojmë me NATO-n”./RTK
Discussion about this post