Detaje të reja janë zbardhur nga ngjarja e rëndë e ndodhur mbrëmjen e shkuar në Athinë, ku u ekzekutua me 4 plumba pistolete 39-vjeçari shqiptar, i identifikuar si Dikenc Halili. Nga kamerat e sigurisë, duket qartë se ngjarja ka ndodhur përpara një lokali, i cili nga informacionet dyshohet të jetë në pronësi të tij. Në momentin e ngjarjes, ka pasur një numër të madh dëshmitarësh okularë, të cilët ishin dhe klientë në lokalin e Halilit. Ata kanë dhënë deklaratat e tyre në komisariat, ku kanë treguar gjithë dinamikën e ngjarjes. Ndër të tjera, nga vëzhgimi i kamerave të sigurisë, pak çaste para ngjarjes Dikenc Halili ka qenë duke biseduar me miqtë e tij, teksa një person i afrohet nga pas. Në një distancë të vogël, autori ka shtënë në drejtim të 39-vjeçarit, ku plumbat e kapën në kokë e trup. Ai u dërgua menjëherë në spital në gjendje të rëndë, por nuk mundi t’i mbijetojë plagëve të marra.
Për sa i përket 39-vjeçarit Dikenc Halili, sipas policisë greke, ai është një person me precedencë të mëparshme penale. Pista e cila po hetohet nga ana e policisë mbetet ajo e larjes së hesapeve.
